Matteüs 23

Jezus veroordailt schriftgeleerden en Farizeeërs

¹ Dou zee Jezus tegen t volk en tegen zien leerlingen: ² "Schriftgeleerden en Farizeeërs binnen op Mozes zien leerstoul zitten goan. ³ Dou doarom alles wat of zai tegen joe zeggen. Hol joe aan heur woorden, mor dou nait noar heur doaden. Wat ze zeggen, doun ze ja zulm nait! ⁴ Ze binden swoare pakken bie nkander en leggen dij mensken op nek, mor zulm steken ze der gain vinger noar oet. ⁵ Bie alles wat ze doun, komt t ter bie heur allenneg mor op aan: opvalen bie mensken! Zo moaken ze braide gebedsraimen om kop en om aarms, en aan heur klaaier toefkes van wonder en geweld. ⁶ Bie t eten willen ze geern aan t bovenènd zitten en in sinegoges op veurste rieg. ⁷ Op maart willen ze geern dat mensken heur goidag zeggen en dat ze aansproken worden mit 'rabbi'. ⁵¹ ⁸ Mor ie mouten joe nait aantoalen loaten mit 'rabbi'. Ie hebben ja mor ain, dij joen Meester is. Zulm bin ie altmoal bruiers en zusters onder nkander. ⁹ Tegen ain op eerde mout ie ook nait 'voader' zeggen. Ie hebben ja mor ain voader: joen Voader in hemel. ¹⁰ Loat joe ook nait 'laaidsman' nuimen. Der is mor ain joen laaidsman: de Christus. ¹¹ Mor veurnoamste maank joe, mout joen knecht wezen. ¹² Elkenain dij zokzulm hoog in reken het, zel niks in reken wezen. Dij zokzulm niks in reken het, dij zel hoog in reken wezen.
¹³ O wai joe, schriftgeleerden en Farizeeërs! Wat bin ie toch kemediespeulers! Ie doun t Hemels Keunenkriek veur mensken op slöt . Zulm goan ie doar ja nait in en loaten aandern, dij der wel in willen, nait geworden. ⁵²
¹⁵ O wai joe, schriftgeleerden en Farizeeërs! Wat bin ie toch kemediespeulers! Ie swaalken zee en laand rond om ain mensk te bekeren. As e zo wied is, moak ie der n duvelskind van, helfte slimmer as ie zulm. ¹⁶ O wai joe, blinde laaiders! Ie zeggen: 'As ain n aid oflegt bie tempel, den telt dat nait. Mor as e bie t gold van tempel sweert, mout e zok ter aan holden.' ¹⁷ Haalfwieze en blinde lu! Wat is nou meer weerd: t gold, of tempel dij t gold haaileg moakt het? ¹⁸ Wieder nog: 'As ain n aid sweert bie t altoar, den het dat niks om hakken. Mor as hai dat dut mit de goave der op, mout e zok ter aan holden.' ¹⁹ Wat bin ie toch blind! Wat is nou meer weerd: de goave of t altoar, dat goave haaileg moakt? ²⁰ Doarom: wèl sweert bie t altoar, sweert tougelieks bie alles wat ter op ligt. ²¹ En wèl of sweert bie tempel, sweert ook bie Hom, dij doar tou holdt. ²² En wèl of bie hemel sweert, sweert tougelieks bie God zien troon en bie Hom dij der op zit.
²³ O wai joe, schriftgeleerden en Farizeeërs! Wat bin ie toch kemediespeulers! Ie ovvern ja wel t tiende paart van kruzemunt, anies en kemien, mor wat of t swoarste wegen dut in wet, doar loat ie joe niks aan gelegen liggen: recht, omdenken en traauw. t Aine mout je doun, mor t aander nait loaten! ²⁴ Blinde laaiders dat ie binnen! n Mug visk ie wel oet, mor n kemeel sloek ie deur!
²⁵ O wai joe, schriftgeleerden en Farizeeërs! Kemediespeulers! Boetenkaant van beker en schuddel moak ie schoon, mor aan binnenkaant zitten ze vol roverij en gemaineghaid. ²⁶ O, blinde Farizeeërs! Moak eerst beker van binnen schoon, den komt boetenkaant ook wel.
²⁷ O wai joe, schriftgeleerden en Farizeeërs! Kemediespeulers dat ie binnen! Ie lieken ja op witkaalkte grafkelders! Van boeten zain ze der mooi oet, mor van binnen zitten ze vol doodsbonken en aander onnuur goudje. ²⁸ Zo is t ook mit joe: veur t oog van t volk, aan boetenkaant, hail deugdzoam, mor van binnen zo vaals en gemain as de moord!
²⁹ O wai joe, schriftgeleerden en Farizeeërs! Wat bin ie toch kemediespeulers! Ie baauwen ja grafstainen veur perfeten en versieren gedenkstainen van rechtschoapen lu. ³⁰ Den zeg ie: 'As wie in tied van ons veurolders leefd haren, zol we nait aan moord op perfeten mitdoan hebben.' ³¹ Doarmit geef ie zulm tou, dat ie kinder binnen van lu, dij perfeten ombrocht hebben. ³² Moak mor òf doar joen voaders mit begund binnen!
³³ Slaangen dat ie binnen! Adderbrud! Hou zel ie ontkommen aan t oordail dat joe noar hel verwist? ³⁴ Knup dit goud in oren: doarom stuur Ik perfeten, wieze manlu en schriftgeleerden noar joe tou. Paardie van heur zel ie doodmoaken en aan t kruus sloagen, aandern giezeln in joen sinegoges en achter heur aan joagen, van t aine loug noar t aander. ³⁵ Zó zel aal t rechtveerdege bloud dat op dizze wereld vergoten is, op joen kop deel kommen. Van rechtveerdege Oabel zien bloud òf, aan dat van Zacharias, Berekja zien zeun, tou. Dij heb ie ja ombrocht tussen tempelgebaauw en altoar. ³⁶ Zeker woar, Ik zeg joe: aal dizze dingen zellen op kop deel kommen van dizze generoatsie."