Matteüs 22

Geliekenis over bruloft

¹ Jezus sprak vannijs tegen heur in geliekenizzen:
² "t Hemels Keunenkriek liekt hier op: Der was ais n keunenk, dij veur zien zeun n bruloft regelde. ³ Hai stuurde zien knechten der op oet. Dij zollen, dij e veur bruloft nuigd haar, oproupen. Mor ze wollen nait kommen. ⁴ Vannijs stuurde hai aander knechten der op oet. Dij zollen tegen lu dij nuigd wazzen, zeggen: 'Kiek ais, ik heb t feest veur joe kloar! Bollen en vedde kaalver binnen slacht. Alles is veur mekoar! Komt op bruloft!' ⁵ Mor ze deden of ze niks heurden: elkenain ging vot, ain noar zien laand tou, d'aander noar zien affeer. ⁶ Der wazzen ook nog gounent, dij grepen knechten beet, tiggelden heur òf, joa, sluigen heur dood. ⁷ Keunenk wer hoagels. Hai stuurde zien soldoaten der op òf en luit moordenoars ombrengen. Heur stad stook e in braand. ⁸ Dou zee e tegen zien knechten: 'Alles was kloar veur bruloft, mor dij nuigd binnen, wazzen t nait weerd. ⁹ Goa op kruuspunten stoan en nuig elkenain dij ie mor vinden kinnen'. ¹⁰ Knechten gingen stroat op en brochten elkenain mit, dij ze mor vinden konden: minnen en besten - t was heur krekt geliek. Al gaauw zat feestzoal vol mensken.
¹¹ Dou keunenk zoal in kwam om ais te kieken noar gasten aan toavel, zag e ain zunder bruloftsklaaieroazie. ¹² Hai zee tegen hom: 'Mien laive man, hou bistoe zunder bruloftsklaaier aan, hier heer kommen?' Doar wos man niks op te zeggen. ¹³ Dou zee keunenk tegen zien bedaindes: 'Knevelt hom handen en vouten en smiet hom der oet, in t duustern. Doar zellen ze hoelen en mit tanden knaarzen!'
¹⁴ Hail veul binnen ja roupen, mor oetkeurd binnen der mor n poar!"