Matteüs 12

Jezus zien volk

⁴⁶ In tied dat E t volk nog tousprak, stonden zien moeke en zien bruiers boetendeur te wachten. Ze wollen mit Hom proaten. [⁴⁷ Ain zee tegen Hom: "Joen moeke en joen bruiers stoan boeten te wachten. Ze willen Joe geern even hebben."] ⁴⁸ "Wèl is mien moeke en wèl binnen mien bruiers?", zee Jezus tegen man. ⁴⁹ Hai wees noar zien leerlingen. "Kiek!", zee E, "doar heb ie mien moeke, en doar heb ie mien bruiers. ⁵⁰ Dij dut wat of mien Voader in hemel wil, dat is mien bruier, mien zuster en mien moeke."