Matteüs 12

Hou kin soatan, soatan oetdrieven?

²² Op n keer wer der ain bie Hom brocht dij bezeten was. Boetendes was e blind en kon ook nait proaten. Jezus muik hom beder: man kon weer proaten en weer zain. ²³ Aal t volk ston der versteld van. "Dit is Doavid zien Zeun toch nait?", zeden ze. ²⁴ Farizeeërs heurden dat. "Dizze man", zeden ze, "kin allenneg kwoaie gaisten oetdrieven mit behulp van Beëlzebul, kwoaie gaisten heur boas." ²⁵ Mor Jezus haar wel deur wat of ze in t zin haren en zee tegen Farizeeërs: "Elk riek doar twijspaalk is, gaait verloren, en gain stad of femilie doar twijspaalk is, zel bestoan blieven. ²⁶ As aine soatan aander soatan oetdrift, rakt e mit zokzulm in twijspaalk. Hou zel zien riek den standholden kinnen? ²⁷ Ie beweren dat Ik mit behulp van Beëlzebul kwoaie gaisten oetdrief. Mor zegt Mie den ais, mit behulp van wèl drieven joen aigen mensken ze oet? Doarom zellen ze zulm richters over joe wezen. ²⁸ Mor as Ik mit behulp van God zien Gaist kwoaie gaisten oetdrief, den is God zien Keunenkriek aan joe toukommen.
²⁹ Aans zegd: hou kin ain bie n staarke kerel inbreken en zien hoesgroad stelen? Eerst zel e den toch wel dij staarke kerel vaastbinden mouten! Den eerst zel e zien hoes leeghoalen kinnen.
³⁰ Dij t nait mit Mie holdt, staait tegen Mie. Dij nait mit Mie schoapen bie nkander drift, dij jagt ze oet nkander. ³¹ Doarom zeg Ik joe: ale kwoad zel mensken vergeven worden, alderdeegs as ze God lèlk moaken. Mor dij Hillege Gaist op t woord brengt, dij zel t nooit vergeven worden. ³² As ain Menskenzeun op t woord brengt, dat zel hom vergeven worden. Mor as ain Hillege Gaist lèlk moakt, den zel hom dat nait vergeven worden. Nou nait en nooit nait!"