Matteüs 12

Jezus en sabbat

¹ Op n sabbat laip Jezus deur stokken koorn hèn. Zien leerlingen werden gammel. Ze begunden oaren òf te strupen en atten t koorn op. ² Farizeeërs zaggen dat. Ze zeden tegen Hom: "Kiek toch ais! Joen leerlingen doun wat, dat op sabbat nait mag!" ³ Hai antwoordde heur: "Heb ie den nait lezen wat of Doavid doan het dou hai en zien manlu honger kregen? ⁴ Hai ging in God zien hoes en at mit zien manlu broden op dij op t altoar laggen. Dat mog e toch nait doun? En zien manlu toch net zo min? Priesters maggen dij toch allenneg mor opeten? ⁵ Of heb ie nait lezen in wet dat priesters dij op sabbat in tempel dainst doun, wel sabbatswet overtreden, mor dat t heur nait aanrekend wordt? ⁶ Mor Ik zeg joe: Hier gaait t om meer as allain om tempel. ⁷ As ie begrepen haren wat of t betaikent: 'baarmhaarteghaid, doar gaait t Mie om, nait om ovvers ²⁷ ', den haar ie onschuldege lu nait veroordaild. ⁸ Menskenzeun is ja boas over sabbat!"
⁹ Hai ging doarvandoan wieder en kwam bie heur in sinegoge. ¹⁰ Doar was net ain mit n verschrompelde haand. Ze vruigen Hom: "Mag je op sabbat wel mensken beder moaken?" Ze wollen Hom ja aanbrengen. ¹¹ "Heur ais!", zee E. "Ain van joe het n schoap. Dij vaalt in n koel. Op sabbat! Zol e t daaier den nait vot tou koel oettrekken? ¹² n Mensk is toch zeker veul en veul meer weerd as n schoap? Doarom mag ie ook op sabbat mensken beder moaken." ¹³ Dou zee E tegen man: "Steek joen haand ais oet!" Dat dee e, en dij haand wer krekt zo gezond as aander. ¹⁴ Farizeeërs gingen tou sinegoge oet en beroadden zok hou of ze Hom om haals brengen konden.
¹⁵ Mor Jezus haar dat deur en week doarom oet noar n aander stee. n Tjucht volk ging achter Hom heer. Hai muik aal heur zaiken beder, ¹⁶ en wol nait lieden dat ze Hom kundeg muiken. ¹⁷ Zo wer woarhaid wat perfeet Jesajoa zegd het:
¹⁸ "Kiek, mien knecht, dij Ik oetkeurd heb:
mien laiverd, n mensk noar mien haart.
Mien Gaist leg Ik op Hom.
Haaidens zel E t oordail verkundegen.
¹⁹ Gain roezie zel E moaken of bèlken,
zien stem zellen ze op stroat nait heuren.
²⁰ t Raait dat knikt is, zel E nait breken,
Pit dij kwaalmt, zel E nait doven,
aleer Hai t recht winnen loaten het.
²¹ Haaidens zellen op zien noam heur hoop zetten. ²⁸ "