Matteüs 11

Jezus en Johannes de Deuper

² Johannes, dij nog altied in gevangenis zat, mout ie waiten, heurde over de Christus zien waark. Hai stuurde gounent van zien leerlingen noar Hom tou. Ze zollen vroagen: ³ "Bin Ie de man dij kommen zol, of mout we nog op n aander wachten?" ⁴ "Goat noar Johannes weerom", zee Jezus tegen heur, " en vertelt hom wat ie heurd en zain hebben: ⁵ Blinden kinnen weer zain. Lammen lopen weer. Meloatse lu worden weer geef. Doven heuren weer. Doden worden opwekt. Aarme lu kriegen t evengelie. ⁶ Gelukkeg, wèl zok nait aan Mie aargert."
⁷ Dou ze weer vot gingen, begunde Jezus tegen t volk over Johannes te zeggen: "Woar bin ie in woestijn op ofgoan? Wat wol ie doar zain? Raait dat deur wind hènneweer zuit? ⁸ Mor woar bin ie den aal op ofgoan? Op n mensk mit weelderge klaaier aan? Dij mooi aantrokken binnen, wonen in pelaaizen van keunenks. ⁹ Mor wat wol ie den toch zain? n Perfeet? Joa, Ik zeg joe: hai is alderdeegs meer as n perfeet. ¹⁰ Hai is t over wèl of schreven staait:
'Denkt ter om!
Ik stuur mien bode veur Joe oet
dij joen weg veur Joe kloarmoaken zel. ²⁶ '
¹¹ Zeker woar, Ik zeg joe: maank ale mensken dij geboren binnen, is gainain groder as Johannes. Mor lutjeste in God zien Keunenkriek is groder as hai! ¹² Vanof Johannes zien tied aan nou tou het t Keunenkriek van Hemel t swoar te verduren, en elkenain perbaaiert ter mit geweld in te kommen. ¹³ Wet en ale perfeten aan Johannes tou hebben dat in t veuren al zegd. ¹⁴ En as ie t nou mor aannemen willen: Johannes is Elioa, dij kommen zel.
¹⁵ Wèl oren het, mout ter ook mit lustern!"