Matteüs 10

Apostels worden oetstuurd

¹ Jezus raip zien twaalf leerlingen bie zok, gaf heur macht om kwoaie gaisten oet te drieven en ale zaikte en ale kwoal beder te moaken. ² Dij twaalf haiten zo: nummer ain Simon, doar ze ook wel Petrus tegen zeggen; den zien bruier Andreas en wieder Jakobus, Zebedeüs zien zeun, mit zien bruier Johannes; ³ Filippus en Bartoloméüs; Tomas en tolboas Matteüs; Jakobus, Alféüs zien zeun, en Taddéüs; ⁴ Simon, mit bienoam Vrijhaidsstrieder, en Judas Iskariot, man dij Jezus verroaden het. ⁵ Dizze twaalm werden deur Jezus op pad stuurd mit bosschop: "Kaant van haaidens nait op goan en nait in n stad goan doar Sameritoanen wonen. ⁶ Goat laiver noar ofdwoalde schoapen van t hoes Izrel tou, dij der min aan tou binnen. ⁷ Onderwegens mout ie mensken aanzeggen: 't Keunenkriek van hemel is stoefbie!' ⁸ Moakt zaike lu beder, moakt doden weer leventeg, meloatse mensken weer geef, drieft kwoaie gaisten oet. Omsunt heb ie t kregen, omsunt mout ie t geven.
⁹ Neemt gain gold-, zulver- of kopergeld mit in buus, ¹⁰ gain pong veur onderwegens, gain twij hemdrokken, gain schounen en gain handstok. Aarbaider is zien kost ja weerd.
¹¹ En netgeliek in wat veur stad of loug ie kommen, kiekt den eerst bie wèl of ie t beste touholden kinnen. En blieft doar aan joen ofraais tou. ¹² Kom ie doar in hoes, geeft t groutnis en wens t vree. ¹³ As t hoes t weerd is, den mag joen vree der op deel kommen. Mor aans mag joen vree bie joe weerom kommen. ¹⁴ Willen ze joe der nait in loaten en waaigern ze noar joe te lustern, goat den tou dat hoes oet en bie dij stad vandoan en stubt joen vouten òf. ¹⁵ Ik zeg joe: Sodom en Gomorra zellen der beder ofkommen op dag van t oordail as dij stad! Zeker woar!
¹⁶ Denkt ter om: Ik stuur joe as schoapen middenmaank wolven. Weest doarom zo veurzichteg as slaangen en aargeloos as doeven. ¹⁷ Woart joe veur mensken! Zai zellen joe aan richters oetlevern en joe mit sweep tamtaaiern in heur sinegoges. ¹⁸ Zai zellen joe veurbrengen veur stadholders en keunenks, om Mie. Den zel ie veur heur en veur haaidens om Mie getugen mouten. ¹⁹ Mor as ze joe oetlevern, mout ie der nait over inzitten hou of wat ie zeggen zellen. Op t aigenste ogenblik zel joe wel ingeven worden wat of ie zeggen mouten. ²⁰ Ie binnen t ja nait dij t zeggen: joen Voader zien Gaist, dij sprekt in joe.
²¹ Aine bruier zel aander oetlevern en dood insturen. Alderdeegs voaders doun t zulmde mit heur kinder. Kinder zellen zok keren tegen heur olders, en heur de dood aan doun. ²² Joa, elkenain zel joe hoaten, om Mie. Mor wèl t tou t ènd tou oetholdt, dij zel t levent ter òf redden.
²³ Zitten ze achter joe heer in d'aine stad, noagelt der oet noar d'aander tou. Neemt mor van Mie aan: Menskenzeun zel kommen veur en aleer ie ale steden in Izrel bie laans west hebben.
²⁴ Leerling staait nait boven zien meester, of knecht boven zien boas. ²⁵ Leerling mout blied wezen as e zo wied komt as zien meester, en knecht zo wied as zien boas. As ze boas van t hoes al oetmoaken veur Beëlzebul, houveulstemeer zellen ze dat zien volk nait doun.
²⁶ Weest doarom mor nait baang veur heur. Der is ja niks ofdekt of t zel bloot kommen, en niks achter holden of t zel bekend worden. ²⁷ Aal wat Ik joe zeg bie duustern, mout ie bie lichten zeggen. Aal wat of ie joe in t oor flustern heuren, mout ie van doaken òf oetbezunen! ²⁸ Weest nait baang veur heur, dij t liggoam wél ombrengen kinnen, mor zail nait. Weest laiver baang veur Hom dij baaident, liggoam en zail, vernailen kin in hel. ²⁹ Dounen muskes nait n stuver de twij? Toch valen ze gainain van baaident omdeel, boeten joen Voader om. ³⁰ En hoaren op joen kop binnen alderdeegs altmoal teld. ³¹ Weest doarom nait baang: ie binnen meer weerd as n haile tjucht muskes.
³² Elkenain dij der tegenover mensken veur oetkomt, dat e bie Mie heurt, veur dij zel Ik oetkommen veur mien Voader dij in hemel is. ³³ Mor wèl of Mie tegenover mensken nait kennen wil, dij zel Ik ook nait kennen willen veur mien Voader in hemel.
³⁴ Haar ie docht, dat Ik in wereld vree brengen zol? Gain denken aan! Ik breng gain vree, mor t sweerd. ³⁵ Ik bin kommen om n kiel te drieven tussen voader en zeun, tussen moeke en dochter en tussen schoonmoeke en schoondochter. ²⁵ ³⁶ Joa, lu dij sib tou nkander binnen, zellen nkanders vijanden worden.
³⁷ Wèl meer van zien pa of zien moeke holdt as van Mie, is veur Mie niks weerd. Ook wèl zien zeun of zien dochter laiver het, is veur Mie niks weerd. ³⁸ Net zomin is veur Mie niks weerd, dij zien kruus nait op nek nemt en achter Mie heer gaait. ³⁹ Wèl aan zien levent vaast holdt, zel t verlaizen. Mor wèl of zien levent verlust om Mie, dij zel t vinden.
⁴⁰ Wèl of joe der in let, let Mie der in. En wèl of Mie der in let, dij let Hom der in dij Mie stuurd het. ⁴¹ Wèl of n perfeet der in let, omreden t is n perfeet, dij zel t loon van n perfeet kriegen. Wèl of n rechtveerdege der in let, omreden hai is rechtveerdeg, dij zel t loon van n rechtveerdege kriegen. ⁴² Wèl of aan ain van dizze lutjekes wat geft, ook al is t mor n napke kold wotter, omreden hai is n leerling, zien loon zel e wis nait mislopen. Neemt dat mor van Mie aan!"

11

¹ Dou Jezus kloar was mit t geven van odders aan zien twaalf leerlingen, raaisde Hai doar vandoan om in heur steden te onderrichten en te verkundegen.