Maarcus 9

Twijde moal t lieden veurzegd

³⁰ Doarvandoan raaisden ze deur Galileoa. Hai wol nait lieden dat ain dat te waiten kwam: ³¹ Hai was nou dounde zien leerlingen onderricht te geven. "Menskenzeun wordt oetleverd in handen van mensken", zee E tegen heur. "En zai zellen Hom doodmoaken. Mor drij doag noa zien dood zel E opstoan." ³² Begriepen deden leerlingen dij woorden nait, mor om oetleg vroagen duurden ze ook nait.
³³ Dou ze thoes kommen wazzen in Kafárnaüm, vruig E heur: "Woar heb ie t onderwegens over had?" ³⁴ Mor zai huilen koezen stief op nkander. Onderwegens haren ze t ter ja over had wèl van heur t belangriekste was. ³⁵ Jezus ging zitten, raip de Twaalm bie zok en zee: "Wèl bie joe nummer ain wezen wil, dij mout aandern veurgoan loaten en ale lu heur knecht wezen." ³⁶ Hai kreeg n kind bie haand, zette hom midden in kring hèn en sluig aarm om hom tou. ³⁷ "Elkenain", zee E, "dij zo'n kind opnemt in mien noam, dij nemt Miezulm op. En dij Mie opnemen dut, nemt bloots Mie nait op, mor Hom ook dij Mie stuurd het."
³⁸ "Meester", zee Johannes tegen Hom, "wie hebben ain zain dij in joen noam duvels oetdreven het. Wie hebben hom tegenholden: hai heurde ja nait bie ons!" ³⁹ Jezus was t doar nait mit ains. "Loat hom toch geworden!", zee E. "As ain op mien gezag wonders dut, den zel e nait gaauw maal over Mie proaten. ⁴⁰ Dij nait tegen ons is, is veur ons. ⁴¹ As ain joen n napke kold wotter aanlangt in Christus zien noam, dij krigt zien loon doarveur. Dat beloof Ik joe!
⁴² Wèl ain van dizze lutjekes, dij op Mie vertraauwen, van t goie pad ofbrengt, dij konden ze mor beder mit n meulenstain om haals midden in zee smieten. ⁴³ As joen haand moakt, dat ie van t goie pad ofdwoalen, kap hom den òf! Ie kinnen beder schonden t levent ingoan, as mit baaide handen in hel te lande kommen, in t vuur dat nooit oet wil. ⁴⁵ ⁷ En as joen vout moakt, dat ie van t goie pad ofdwoalen, kap hom den òf. Ie kinnen beder hankemank t levent ingoan, as mit baaide vouten in hel te lande kommen. 477 En as joen oog moakt, dat ie van t goie pad ofdwoalen, rop hom der den oet. Ie kinnen beder mit ain oog in t Keunenkriek van God kommen, as mit baaide ogen in hel smeten worden. ⁴⁸ Doar blieven wurms mor aan vreten en t vuur gaait doar nooit oet. ⁸
⁴⁹ Elkenain zel schoonbraand worden as mit zolt. ⁵⁰ Zolt is wat gouds. Mor as kracht der oet is, wèl zel t den weer bruukboar moaken kinnen? Ie mouten zolt in joezulm hebben en in vree mit nkander leven."