Maarcus 9

Jezus op baarg mit Mozes en Elioa

² Zès doag loater nam Jezus Petrus, Johannes en Jakobus mit en brochde heur noar boven, bie n hoge baarg op. Doar was E mit heur allain. En veur heur ogen veraanderde zien veurkommen. ³ Zien klaaier werden blinkend, helder wit, krekt zo as t licht; zó wit, as gain blaiker op haile wereld veur nkander krigt. ⁴ En wat zaggen ze? Elioa en Mozes dij mit Hom stonden te proaten! ⁵ "Rabbi, dat komt ja mooi oet, dat we hier binnen", zee Petrus tegen Jezus. "Zel k hier drij tìnten moaken? Ain veur Joe, ain veur Mozes en ain veur Elioa?" ⁶ Hai wos ja nait wat of e zeggen mos: zo slim haren ze schrik in bainen. ⁷ Der kwam n wolk mit zien schaar over heur hènvalen. Doar klonk n stem oet: "Dit is mien laive Zeun! Noar Hom mout ie lustern!" ⁸ Op ainmoal zaggen ze, dou ze om zok tou keken, Jezus allenneg nog mor en aans gainent meer.
⁹ Ze gingen bie baarg omdeel. Hai gaf heur n inzeggen, ze zollen gainain vertellen wat of ze zain haren, veurdat Menskenzeun oet doden opstoan was. ¹⁰ En woar: ze huilen t stil. Mor ze haren t ter wel onder nkander over wat dat ainlieks betaikent: "Oet doden opstoan." ¹¹ Doarom vruigen ze Hom: "Woarom zeggen schriftgeleerden toch dat Elioa eerst kommen mout?" ¹² Hai antwoordde: "Elioa komt eerst en zel alles in odder moaken. Mor woarom staait ter den over Menskenzeun schreven, dat E veul lieden mout en E nait in reken wezen zel? ¹³ Nou, Ik zeg joe: Elioa het ter al west en ze hebben mit hom doan wat of ze mor wollen. Krekt geliek zo as ter over hom schreven staait."