Maarcus 8

Jezus geft vaaierdoezend man te eten

¹ In dij doagen was der weer ais n grode koppel volk bie nkander. Ze haren niks te eten. Hai raip zien leerlingen dou bie zok. ² "Ik heb slim te doun mit dizze mensken", zee E. "Al drij doag binnen ze bie Mie en ze hebben gain krummel te eten. ³ As Ik ze mit n lege moag votstuur, valen ze Mie der onderwegens nog bie deel. Boetendes kommen gounent van wied weg." ⁴ Leerlingen vruigen: "Woar hoal je in dizze ainzoame streek genog brood vandoan om aal dij mensken eten te geven?" ⁵ "Houveul brood heb ie bie joe?", vruig Jezus. "Zeuven!", zeden ze. ⁶ Hai luit mensken op grond zitten goan.
Dou pakte Hai dij zeuven broden, zee t dankgebed, brook ze en gaf ze aan leerlingen om aan t volk oet te dailen. Dat deden ze. ⁷ Ze haren ook nog wat viskes. Hai sprak zegenbee weer oet en luit dij ook onder t volk verdailen. ⁸ Mensken kregen altmoal te eten en werden zat. Wat ter aan brokken overbleef, huilen ze bie nkander: zeuven körfvol. ⁹ Der wazzen om en bie vaaierdoezend mensken. Dij stuurde Hai noar hoes tou. ¹⁰ Hai stapte opslag mit zien leerlingen in boot om noar kontrainen van Dalmanuta te goan.