Maarcus 7

Jezus moakt n doofstomme man beder

³¹ Hai raaisde weer òf oet kontrainen van Tyrus en ging over Sidon weerom noar t meer van Galileoa, midden in Tienstedenlaand. ³² Loaten ze nou n dove man bie Hom brengen! Proaten kon e mor naauw. Ze vruigen Hom man handen op te leggen. ³³ Jezus trok Hom opzied, n beetje bie mensken vandoan. Hai stopte hom vingers in oren en kwam mit n beetje spij zien tong aan. ³⁴ Dou keek E noar hemel omhoog, huil daip oam en zee: "Effata!" Dat bedudt: "Goa open!" ³⁵ Op t aigenste moment gingen man zien oren open, zien tong kwam lös en hai kon gewoon proaten. ³⁶ Hai bestelde heur t aan gainain te vertellen. Mor hou meer Hai heur dat zee, hou haarder ze t rondbezuunden. ³⁷ Mensken konden der mit heur haile verstand nait bie. "Kolesoal, wat dij man altmoal wel nait dut!", zeden ze. "Hai moakt dat dove lu heuren en dat stommen proaten kinnen!"