Maarcus 7

Menskegeboden en God zien gebod

¹ Farizeeërs en n stok of wat schriftgeleerden oet Jeruzelem kwammen mit nkander bie Hom. ² Ze zaggen dat gounent van zien leerlingen heur brood opatten mit "onnure" handen, dat wil zeggen: mit handen dij ze nait veurtied wosken haren. ³ Farizeeërs en Jeuden in t aalgemain goan ja nait eerder eten, as dat ze eerst handen wosken hebben. Zo holden ze noamelk vaast aan olden heur gewoontes. ⁴ Ook as ze van maart kommen, hemmeln ze zok eerst mit n beetje wotter veur dat ze eten. Zo binnen der nog veul meer gewoontes doar ze aan vaastholden, zo as t omspoulen van bekers, kroeken en kopern riw. ⁵ Doarom vruigen Farizeeërs en schriftgeleerden Hom: "Woarom doun joen leerlingen nait wat of ons veurolders aaltied doan hebben, mor eten ze mit onnure handen heur brood?" ⁶ "Jesajoa haar geliek", antwoordde Hai, "dou e over kemediespeulers zo as ie binnen, zegd het, krekt zo as ter in Schrift staait, ⁴ :
Dit volk eert Mie mit zien mond,
mor heur haart is wied van Mie òf.
⁷ Dat ze Mie eren het niks om hakken,
wat of zai veur woarhaid oetgeven,
binnen allain mor menskegeboden."
⁸ Ze loaten Gods gebod lös en holden mensken heur gewoontes vaast!" ⁹ En Hai ging wieder: "t Is wat moois, zo as ie Gods gebod aan zied zetten om vaast te holden wat of joen veurolders joe leerd hebben. ¹⁰ Mozes het t zo zegd: 'Holdt joen pa en moeke in eren', en 'Wèl of zien pa en moeke verflukt, dij zel ombrocht worden'. ⁵ ¹¹ Mor ie beweren: 'As ain tegen zien pa of tegen zien moeke zegt: aal wat ie van mie trekken hebben kind, is korban - is ovvergoave -, ¹² den huift e zien pa of moeke nait meer te helpen'. ¹³ Zo heb ie Gods gebod kracht ofnomen, omwille van wat of joen veurolders deden. En zukse zoaken doun ie gain klaain beetje!"
¹⁴ Dou E t volk nog ais bie zok roupen haar, zee E tegen heur: "Lustert! Begriept Mie goud! ¹⁵ Gainain wordt onnuur van wat van boeten òf in hom komt, nee, aansom, wat oet hom noar boeten komt, dat moakt hom onnuur."
¹⁷ ⁶ Dou E thoeskommen was, bie t volk vandoan, vruigen zien leerlingen Hom wat dij oetsproak betaikende. ¹⁸ "Heb ie der nog aaltied gain besef van?", vruig E. "Begriep ie nait dat wat bie n mensk van boeten noar binnen gaait, hom nait onnuur moaken kin? ¹⁹ Dat komt ja nait in zien haart mor in moag te lande en t komt ter op t gemak weer oet. Zo luit E heur waiten, dat ale eterij zuver is. ²⁰ En Hai zee der bie: "Wat tou n mensk oet komt, dát moakt hom onnuur."
²¹ Want van binnen oet, oet mensken heur haart, kommen minne gedachtens, ontucht, daiverij, moord, ²² ontraauw, groaperghaid, gemaineghaid, verneukerij, lösbandeghaid, ofgunst, proaterij, grootdounerij en onverstand. ²³ Aal dij minne dingen kommen van binnen oet noar boeten tou en moaken n mensk onnuur."