Maarcus 6

Jezus stuurt zien leerlingen der op oet

⁷ Hai raip de Twaalm bie zok en begunde ze op pad te sturen: twij bie twij. En Hai gaf heur macht over onnure gaisten. ⁸ "Neemt niks mit veur onderwegens, bloots n handstok", bestelde Hai heur, "en gain brood, gain pong veur op raais, ook gain geld in buus. ⁹ Maggen wel sandoalen aandoun, mor trekt gain dubbeld stel klaaier aan." ¹⁰ En Hai zee der nog bie: "As ie woaraargens onderdak hebben, blieft doar den tot ie weer wieder mouten. ¹¹ Kom je op n stee doar ze joe nait hebben willen, goat doar den vandoan. Stubt t stof van joen vouten òf: dat is zo t rekent n aanklacht tegen heur!" ¹² Ze gingen op pad en raipen t volk op, n nij levent te begunnen. ¹³ Ze dreven n bult duvelse gaisten oet, zaalfden veul zaike lu mit eulie en muiken heur beder.