Maarcus 6

Jezus lopt over t wotter

⁴⁵ Vot noatied bestelde Jezus zien leerlingen in boot te stappen en alvast veuroet te voaren noar overkaant tou, noar Betsáïda. Hai zol intied mensken noar hoes tou sturen. ⁴⁶ Dou E ofschaaid van heur nomen haar, ging E bie baarg omhoog om te beden. ⁴⁷ t Was al loat worden: boot was midden op t meer en Jezus was aan waal, allenneg. ⁴⁸ Hai zag hou zai zok ofbeulden mit roeien: ze haren t ja in de wind op. Tussen drij en zès uur snaachts kwam E over t meer op heur toulopen en wol heur veurbie goan. ⁴⁹ Leerlingen zaggen Hom over t wotter lopen. Ze dochten dat ze mit n spouk te doun haren en bèlkten t oet. ⁵⁰ Altmoal zaggen ze Hom en ruiken haildaal oetstuur. Votdoalek toalde Hai heur tou: "Stil mor! Nait benaauwd wezen!" ⁵¹ Hai stapte bie heur in boot en wind ging liggen. Ze wazzen haildaal verbiesterd! ⁵² Wat of ter mit t brood gebeurd was, doar wazzen ze niks wiezer van worden. Heur haart was zo haard as n vlint.
⁵³ Ze stoken over noar vaaste waal en legden aan in Gennésaret. ⁵⁴ Mor naauw wazzen ze tou boot oet stapt of mensken zaggen dat Hai t was. ⁵⁵ Joa, heurden lu dat E hier of doar was, den laipen ze haile kontraain deur en kwammen mit heur zaiken op bèr op Hom ofzetten. ⁵⁶ Woar of E ook mor kwam, in dörpen, steden, boerenploatsen, overaal legden ze op t maartplain heur zaiken deel en vruigen Hom, of zaiken allenneg mor even toefke van zien mantel aankommen moggen. En altmoal dij Hom aankwammen, werden beder.