Maarcus 6

Gain vertraauw

¹ Hai raaisde doar vandoan òf en kwam in stad doar E groot worden was. Zien leerlingen gingen mit. ² Dou t sabbat worden was, begunde Hai lu in sinegoge onderricht te geven. Der wazzen n bult mensken. Dou ze Hom heurden, stonden ze der versteld van en zeden: "Woar hóált E t heer? Hou komt E aan dij wieshaid? En den ook nog dij machtege doaden dij Hai dut! ³ Dat is dij timmerman toch? Maria heur zeun, dij bruier van Jakobus, Joses, Judas en Simon? En zien zusters wonen dij hier ook nait?" En ze aargerden zok aan Hom. ⁴ Jezus zee tegen heur: "n Perfeet is overaal in reken, behaalve in ploats doar e vandoan komt, bie zien femilie ook nait en bie zien aigen volk net zo min." ⁵ Hai kon doar gain enkelde machtege doad oetrichten, of t mos al wezen n poar zaike mensken beder moaken deur heur handen op te leggen. ⁶ Jezus verwonderde zok, dat ze gain vertraauw in Hom haren. En Hai ging dörpen in de buurt òf om onderricht te geven.