Maarcus 5

Bezeten man beder moakt

¹ Ainmoal aan overkaant van t meer, kwammen ze in kontrainen van Géraseners. ² Mor naauw was Jezus tou boot oetstapt of doar kwam n man op Hom òf, van begroafploats vandoan. n Onnure gaist haar hom te pakken, ³ en hai huil tou in dij groaven doar. Ze konden hom alderdeegs mit kettens nog nait vaastbinden. ⁴ Hai haar al wel voak mit voutboeiens en kettens vaastbonden west, mor kettens haar e oet nkander reten en voutboeiens vernaild. Gainain kon hom holden. ⁵ Dag en naacht laip e maank groaven en in baargen te bèlken en hai beukte zokzulm mit stainen.
⁶ Dou e Jezus van vèrren aankommen zag, vloog e op Hom òf, en ging veur Hom op knijen liggen. ⁷ "Jezus, Zeun van Alderhoogste God, wat hestoe mit mie te moaken?", brulde hai. "Bie God, tamtaaier mie nait!" ⁸ Jezus haar ja tegen hom zegd: "Doe onnure gaist! Goa oet dij man vandoan!" ⁹ "Hou hait ie?", vruig Jezus hom. Hai zee: "Ik hait 'Reziment'. Wie binnen ja mit n haile bult!" ¹⁰ Hai vruig mor aaldeur, heur nait tou dizze kontrainen oet te joagen.
¹¹ Nou wol t gevaal dat op schuunte van dij heuvel doar, net n haile koppel swienen laip op zöcht noar vreten. ¹² "Stuur ons noar dij swienen tou", vruigen gaisten Jezus, "den kin we doar inkroepen!" ¹³ "Tou mor!", zee E tegen heur. En onnure gaisten gingen tou man oet en kropen in swienen. Dou störmde haile koppel mit koegelsgeweld bie schuunte omdeel in t meer en verzoop doar. t Wazzen der wel twijdoezend!
¹⁴ Swieneventjes naaiden der oet en bezuunden t haile verhoal rond in loug en stad. Mensken kwammen kieken wat of ter nou persies gebeurd was. ¹⁵ Ze kwammen bie Jezus en zaggen bezeten man zitten, dij dat haile reziment gaisten in zok had haar, aankled en wel, en bie zien volle verstand. Ze werden der kèl van! ¹⁶ Lu dij der bie west haren, vertelden heur hou t ter aan tou goan was mit bezeten man en dij swienen. ¹⁷ Ze begunden der bie Jezus op aan te dringen: Hai zol oet heur kontrainen vandoan goan.
¹⁸ Dou E aan boord ging, vruig man dij bezeten west haar, of e mit Hom mog. ¹⁹ Mor Jezus wol t nait lieden. "Goa noar hoes tou, noar joen volk", zee E tegen hom, "en vertel heur wat de Heer mit joe doan het en hou goud of E veur joe west het." ²⁰ Man ging vot en vertelde overaal in Tienstedenlaand wat Jezus veur hom doan haar. En elkenain ston der versteld van.