Maarcus 4

Nog meer geliekenizzen

²¹ Hai zee tegen heur: "Droag ie laamp sums aan om hom onder n spintvat of onder t bèr te zetten? Nee toch zeker! Ie zetten hom toch op n stander?! ²² Der wordt ja allenneg mor wat bezied stopt, om t loater veurndag te brengen. t Wer allenneg mor gehaim holden om t aan t licht te brengen. ²³ Wèl oren het, mout ter ook mit lustern!"
²⁴ En Hai ging wieder: "Geeft acht op wat of ie heuren! Mit moat doar ie mit meten, zel ie zulm ook meten worden. Joa, ie zellen der nog wat bie kriegen. ²⁵ Wèl wat het, dij krigt ter ja nog wat bie, mor wèl niks het, dij zel ook nog ofpakt worden wat e het."
²⁶ En Hai vertelde: "t Keunenkriek van God kin je hier mit vergelieken: Der was ais ain, dij zien laand inzaait. ²⁷ Den gaait e sloapen en wordt weer wakker, doagen en naachten achter nkander. t Zoad lopt oet en gaait aan grui - hou of t kin: man wait t nait! ²⁸ As vanzulm brengt grond vrucht op. Eerst t gruine goudje, den oaren en op t lest kloare korrel in oar. ²⁹ As t zo wied is, den slagt e zicht ter votdoalek in: tied is ter heer van zichten en mennen!"
³⁰ En Hai ging wieder: "Woar zel we Gods Keunenkriek (nog meer) mit vergelieken of wat veur beeld zel wie doarveur bruken? ³¹ t Liekt net op n mosterdzoadje: t lutjeste zoadje op haile wereld as t oetzaaid wordt. ³² Mor as t ainmoal zááid is en oetlopt, wordt t groder as aal aander stroekerij en krigt t dikke takken, zodat vogels wel in zien schaar nuzzeln kinnen."
³³ Mit n bult van dit soort geliekenizzen richtte Hai t woord tou heur, veur en zovèr ze t onder pet kriegen konden. ³⁴ Zunder geliekenizzen te bruken toalde Hai heur nait aan. Mor as ze onder nkander wazzen, legde Hai zien leerlingen t aal oet.