Maarcus 4

Geliekenis over t zoad

¹ Op n keer begunde Jezus weer aan kaant van t meer onderricht te geven. Haile koppels volk stroomden op Hom tou, zo veul, dat E in n boot zitten ging op t wotter. t Volk bleef op kaant van waal. ² Hai leerde heur haile veul en bruukte doar geliekenizzen bie: ³ "Lustert es!", zee E. "Der was ais n boer. Dij ging aan t zaaien. ⁴ En wat wil t gevaal? Bie t zaaien vuil n dail van t zoad bie pad laans. Dou kwammen der vogels aan en dij pikten t op. ⁵ n Aander dail kwam in staingrond te lande. Doar lag mor n dun loagje grond. t Zoad kwam al gaauwachteg op: t lag ja nait daip. ⁶ Mor dou zun opkommen was, verbraandde t en omdat t gain worrels zet haar, verdreugde t. ⁷ Weer n aander dail kwam maank stiekels te lande. Dij schoten op en smoorden t zoad, zodat t niks opbrocht. ⁸ Wat ter over was, vuil in goie grond; t kwam goud op en zette vrucht: n dail smeet dattegmoal zo veul op, n dail sesteg- en nog n dail honderdmoal zo veul." ⁹ En Hai zee der bie: "Wèl oren het, mout ter ook mit lustern!"
¹⁰ Dou ze weer onder nkander wazzen, vruigen zien kammeroaden en de Twaalm Hom of E dij geliekenizzen oetleggen wol. ¹¹ "Joe is t gehaim van Gods Keunenkriek aanvertraauwd", zee E, "mor boetenstoanders mouten t mit geliekenizzen doun,
¹² zodat ze schaarp kieken zellen
en niks zain,
inspannen lustern,
mor niks begriepen,
aans zollen ze ja n nij levent begunnen
en vergeven kriegen. ³
¹³ As ie dizze geliekenis nait begriepen", zee Jezus tegen heur, "welke begriep ie den aal? ¹⁴ Dij zaait, zaait t woord. ¹⁵ Dit binnen mensken op t pad doar of t woord zaaid wordt: mor naauw hebben ze t heurd of Soatan komt en pikt heur t woord dat in heur zaaid is, òf. ¹⁶ Dit binnen de mensken dij op staingrond zaaid worden: zo gaauw as dij t woord heuren, nemen ze t blied aan. ¹⁷ Mor t het bie heur gain worrel schoten, t binnen mensken van n ogenslag. As ze loater in verdrukken kommen of achternoa zeten worden, den gonnen ze der mor zo veur omliggen. ¹⁸ Nog weer aandern binnen zai, dij maank stiekels valen. Dat binnen mensken dij t woord wel heurd hebben, ¹⁹ mor den kommen zörg om t bestoan en verneukerij van riekdom en longerderij noar van alles en nog wat, en dij smoren t woord. t Zet gain vrucht. ²⁰ Dit binnen mensken dij in goie grond zaaid binnen: zai heuren t woord, nemen t aan en brengen datteg-sesteg-, joa honderdmoal zo veul op."