Maarcus    2

¹ Dou E n poar doagen loater weerom kwam in Kafárnaüm, werden lu gewoar dat E thoes was. ² Der kwam zo'n smak volk bie nkander dat ze alderdeegs tou deur oetpuulden. Hai vertelde heur wat E te zeggen haar. ³ Ze brochten n verlamde man bie Hom. Vaaier man mozzen hom droagen. ⁴ Omreden ze konden hom vanwegens aal dat volk nait stoef bie Hom kriegen, broken ze t dak open boven stee doar of E touhuil. Dou ze t dak openbroken haren, luiten ze man mit bèr en aal omdeel zakken. ⁵ Dou Jezus heur vertraauw zag, zee E tegen verlamde man: "Mien jong, dien zunden worden vergeven." ⁶ Nou wol t gevaal, dat doar n poar schriftgeleerden zatten dij der zo heur gedachtens bie haren: ⁷ "Hou kin dij man zukswat zeggen? Hai lastert God! Wèl aans kin zunden vergeven?" ⁸ Jezus haar op slag deur wat of ze dochten en zee tegen heur: "Woarom heb ie ainlieks beswoaren? ⁹ Wat is makkelker tegen n verlamde man te zeggen: 'Dien zunden worden vergeven.' of: 'Kom in t èn. Pak dien bèr en goa aan loop'? ¹⁰ Mor Ik zel joe zain loaten, dat Menskenzeun macht het op wereld om zunden te vergeven." Hai zee tegen verlamde man: ¹¹ "Ik zeg die: In t èn! Pak dien bèr en goa noar hoes tou!" ¹² En verdold: hai kwam in t èn, pakte votdoalek zien bèr en ging noar boeten tou. Lu stonden altmoal stom verwonderd te kieken, prezen God en zeden: "Zukswat heb wie nog nooit beleefd!"
¹³ Jezus ging noar boeten tou en laip weer bie t meer laans. Aal t volk kwam op Hom òf en Hai gaf heur onderricht. ¹⁴ Onderwegens zag E Levi, Alféüs zien zeun, bie t tolhoes zitten. "Kom achter Mie heer!", zee Jezus. Levi kwam in t èn en ging achter Hom aan.
¹⁵ Op n keer zat Jezus bie Levi thoes te eten. Hail wat tolboazen en lu dij t mit wet nait aal te naauw nammen, atten mit Jezus en zien leerlingen mit. Der wazzen noamelk hail wat lu, dij achter Hom aan gingen. ¹⁶ Schriftgeleerden dij bie Farizeeërs heurden, zaggen dat E mit wetsovertreders en tolboazen aan t eten was. "Woarom et Hai mit tolboazen en zundoars?", zeden ze tegen zien leerlingen. ¹⁷ Jezus vernam dat en zee: "Gezonde lu hebben gain verlet om n dokter, mor zaiken aal. Ik bin nait kommen om lu te nuigen dij wet noakommen, mor dij wet overtreden."
¹⁸ Johannes de Deuper zien leerlingen en Farizeeërs deden aan vasten. Zai vruigen aan Jezus: "Woarom vasten Johannes zien leerlingen en Farizeeërs heurent wel, mor joenent nait?" ¹⁹ Jezus antwoordde: "Kinnen op bruloft gasten ainlieks wel vasten zo laank as brudeman bie heur is? Zo laank as brudeman bie heur is, kinnen ze toch nait vasten? ²⁰ Mor der komt n tied dat brudeman bie heur vothoald wordt, en den, dij dag, zellen ze vasten.
²¹ Gain mensk stokt n ol jak oet mit n lap dij nog nait krompen is. Dut e dat aal, den trekt nije lap olde jak kepot en scheur wordt allenneg mor slimmer. ²² Ook dut gainain jonge wien in olde wienzakken. Dut e dat aal, den barsten zakken deur wien. Wien vot - zakken vot! Dus: jonge wien in nije zakken!"
²³ Op n sabbat laip Jezus deur stokken koorn hèn. Onderwegens begunden zien leerlingen oaren te teppen. ²⁴ "Kiek toch ais wat of ze doun!", zeden Farizeeërs tegen Hom. "Dat mag ja hail nait op sabbat!" ²⁵ Hai zee tegen heur: "Heb ie nooit lezen wat of Doavid doan het dou hai der maal veurston en hai en zien kammeroaden honger kregen? ²⁶ Hai ging in God zien hoes - Abjatar was dou hogepriester - en at van broden dij op t altoar liggen en dij allenneg priesters mor eten maggen. Boetendes gaf e ze ook aan dij bie Hom heurden te eten." ²⁷ Hai zee ook tegen heur: "Sabbat is ter veur mensken, en nait aansom! ²⁸ Menskenzeun het t doarom ook over sabbat te zeggen!"

3

© 2000 Liudgerstichten. All rights reserved.