Maarcus 14

Jezus in Getsemané

³² Ze gingen noar n stee tou, dij Getsemané hait. "Goat hier zitten", zee Jezus tegen heur, "den goa Ik beden." ³³ Hai nam Petrus, Johannes en Jakobus mit. Dou begunde Hai triesterg en onrusteg te worden. ³⁴ "t Haart begeft t Mie zuver van verdrait", zee E tegen heur. "Blieft hier woaken!" ³⁵ Hai ging nog wat wieder, luit zok plat op grond valen en beedde, dat as t aaids meugelk was, dit uur aan Hom veurbie goan zol. ³⁶ "Abba!", beedde Hai. "Pabbe! Bie Joe is ja alles meugelk! Bespoar Mie dizze beker! Mor nait wat of Ik wil, mor wat Ie willen!"
³⁷ Hai ging weerom noar zien leerlingen tou: altmoal in sloap valen! "Simon, slepst?", vruig E aan Petrus. ³⁸ "Kinst den nog gain uurke mit Mie woaken? Blieft toch wakker en beedt dat ie der nait onderdeur goan. Mensk zien gaist wil wel, mor noatuur is swak!"
³⁹ Weer ging E vot en beedde t zulmde. ⁴⁰ Dou E weerom kwam, zag E dat ze weer in sloap valen wazzen: ze konden ogen ja nait open holden. Ze wozzen nait, wat of ze tegen Hom zeggen mozzen.
⁴¹ Hai kwam veur daarde moal en zee: "Blieft nou mor sloapen en rust mor oet! t Is zo wied! Menskenzeun wordt overleverd in handen van deugennaiten! ⁴² Tou! In t èn! Op pad! Doar komt man al aan, dij Mie overlevert."
⁴³ Hai haar dit nog mor naauw zegd, of doar kwam Judas aan, ain van de Twaalm. Hai haar n tjucht volk bie zok mit sweerden en knuppels. Ze wazzen der op oetstuurd deur hogepriesters, schriftgeleerden en oldsten van t volk. ⁴⁴ Dij Hom overleverde haar n taiken mit heur ofproat en zegd: "Dij ik n smok geef, dat is Hom! Dij mout ie oppakken en vaaileg vaast zetten."
⁴⁵ Hai ging liek op Jezus òf en zee: "Rabbi!" Dou gaf e Hom n smok. ⁴⁶ Ze grepen Jezus beet en pakten Hom op. ⁴⁷ Ain van lu dij der om tou stonden, greep zien sweerd, haauwde op hogepriester zien knecht in: t oor der òf! ⁴⁸ Jezus zee tegen heur: "Bin Ik meschain n bandiet, dat ie mit sweerden en knuppels der op oettrokken binnen om Mie op te pakken? ⁴⁹ Doagelks heb Ik bie joe zeten in tempel en onderricht geven en doar heb ie gain haand noar Mie oetstoken! Mor zo mos oetkommen wat of over Mie schreven staait." ⁵⁰ Dou trokken ale leerlingen aan hakken en luiten Hom in steek.
⁵¹ n Jongkerel ging Hom achternoa. Hai haar n loaken om zien blode lief sloagen: aans haar e niks aan. Ze wollen hom pakken, ⁵² mor hai luit t loaken glippen en naaide der in blode spits tussen oet.