Maarcus 14

t Leste Oavendmoal

¹² t Was eerste dag van t feest van "Ongegèste Broden", dag van t poaskelaam slachten. "Woar wil Ie t poaskelaam eten?", kwammen leerlingen Jezus vroagen. "Den kin we t kloarmoaken goan." ¹³ Hai stuurde twij van zien leerlingen der op oet en zee tegen heur: "Goat noar stad tou. Der zel joe doar n man in muid kommen mit n kroek wotter. ¹⁴ Dij mout ie achternoa goan noar t hoes, doar e in gaait. Zegt den tegen boas van dat hoes: 'Meester vragt: Woar is mien zoal, doar Ik mit mien leerlingen t poaskemoal eten kin?' ¹⁵ Hai zel joe n grode bovenzoal aanwiezen. Doar staait alles wat ter wezen mout. Moakt doar t aal veur Mie kloar!" ¹⁶ Leerlingen gingen vot, kwammen in stad en vonden t altmoal krekt zo as Hai heur verteld haar. En ze muiken t poaskelaam kloar.
¹⁷ Tegen oavendstied kwam Hai der mit de Twaalm aan. ¹⁸ Dou ze bie toavel zatten en aan t eten wazzen, zee Jezus: "Let op mien woorden: ain van joe zel Mie overlevern. Ain dij nou mit Mie aan t eten is!" ¹⁹ Leerlingen werden der slim triesterg van. Ain noa aander vruig: "Ik toch nait, wel?" ²⁰ "Ain van de Twaalm!" zee E. "Ain dij mit Mie zien brood in schuddel stipt. ²¹ Menskenzeun gaait ja wel hèn zo as over Hom in Schriften staait, mor o wai man, deur wèl of Menskenzeun overleverd wordt. Hai haar beder mor nait geboren worden kind."
²² Onder t eten pakte Jezus n brood, sprak zegenbee der over oet, brook t in stokken, gaf heur dij en zee: "Neemt dit, t is mien liggoam!" ²³ En Hai pakte n beker, sprak t dankgebed oet, gaf heur dij deur en zai dronken der altmoal oet. ²⁴ Hai zee tegen heur: "Dit is mien bloud van t verbond, veur veul mensken vergoten. ²⁵ Ik zeg joe: van nou òf aan zel Ik nait meer drinken van wat of wienstok geft, totdat Ik in Gods Keunenkriek van nije oogst drinken zel." ²⁶ Dou zongen ze t loflaid en gingen op pad noar Olievenbaarg tou.