Maarcus 14

Jezus wordt zaalfd en verroaden

¹ Twij doagen loater zol t Poask wezen en t feest van "Ongegèste Broden". Hogepriesters en schriftgeleerden onnaaierden mit nkander hou of ze Jezus op n filaaine menaaier in handen kriegen en ombrengen konden. ² "Mor", zeden ze, "wie mouten dat nait op t feest doun! Der kon ja ais rebulie kommen onder t volk!"
³ Dou E in Betanie was, bie Meloatse Simon, en doar aan t eten was, stelt joe ais veur: doar komt mie n vraauw aan, n albastern vleske vol duroabele narduseulie, moakt van echte nardus, in haand! Ze sluig haals van t vleske òf en goot hom haildaal leeg op zien kop! ⁴ Gounent aargerden zok. "Woar is dij verknapbuzzerij mit dij mirre nou goud veur!" zeden ze. ⁵ "t Haar veur meer as drijhonderd schellenks verkocht worden kind en t geld aan aarme lu geven!" Ze begunden heur oet te vetern. ⁶ "Loat heur toch geworden!", zee Jezus. "Woarom zit ie over dij vraauw heer? Zai het n goie doad veur Mie doan. ⁷ Aarme lu heb ie ja aaltied wel om joe tou, en ie kinnen heur helpen wanneer of ie mor willen, mor Ik zel der nait aaltied wezen. ⁸ Zai het doan wat of ze kon: zai het mien liggoam al zaalfd veur mien begraffenis. ⁹ Zeker woar! Ik zeg joe: aalderwegens woar of dizze Bliede Bosschop verkundegd worden zel in haile wereld, zel der bie verteld worden wat of zai doan het. Zo zellen mensken aan heur denken blieven."
¹⁰ Dou ging ain van de Twaalm, Judas Iskariot haitte hai, noar hogepriesters tou om Hom aan heur oet te levern. ¹¹ Dij wazzen der blied om dou ze dat heurden, en verzeden hom geld te geven. En hai ging op zuik noar n goie gelegenhaid om Hom over te levern.