Maarcus 12

Geliekenis over minne pachters

¹ Hai begunde heur in geliekenizzen aan te toalen: "Der was ais n man, dij n droevetoen aanleggen dee. Hai zette der n heeg om tou, muik ter n koel in om droeven oet te paarzen en baauwde der n oetkiekpost bie. Dou verpachtte hai t spul aan wienboeren en ging op raais noar t boetenlaand. ² Dou t zo wied was, stuurde hai n knecht noar dij wienboeren tou. Ze zollen zien paart ophoalen van wat of droevetoen opsmeten haar. ³ Mor pachters grepen man beet, truvelden hom òf en stuurden hom mit lege handen weerom. ⁴ Boas stuurde nog n aander knecht noar heur tou. Dij gavven ze op kop en scheerden hom gek aan. ⁵ Hai stuurde der nóg ain op òf. Dij brochten ze om haals. En zo ging t nog mit n haile rieg: gounent rammelden ze òf, aandern sluigen ze dood. ⁶ Dou haar e nog mor ain over: zien zeun, doar e slim wies mit was. Op t lest stuurde hai dij noar heur tou. Hai dochde: 'Mien zeun zellen ze ja wel woaren!' ⁷ Mor dij wienboeren zeden tegen nkander: 'Dat is aarfgenoam! Kom op! Wie haauwen hom dood! Den is aarvenis mooi veur ons!' ⁸ Ze grepen hom beet, muiken hom van kaant en smeten hom tou droevetoen oet.
⁹ Wat zel boas van droevetoen nou doun? Hai zel der zulm op òf goan, dij wienboeren dood haauwen en droevetoen aan aander pachters geven. ¹⁰ Heb ie nooit in de Schrift lezen:
'Stain, dij baauwers te min was,
dij is as houkstain bruukt.
¹¹ Zo gaait de Heer te waark.
Is t in ons ogen gain wonder?'" ¹⁶
¹² Ze perbaaierden Hom op te pakken, mor ze wazzen baang veur t volk. Ze haren ja mor al te goud deur dat E mit dizze geliekenizzen heur maind haar. Ze luiten Hom doarom mit vree en gingen vot.