Maarcus 11

Intocht in Jeruzelem

¹ Ze kwammen stoef bie Jeruzelem, bie Betfagé en Betanie, kaant van Olievenbaarg op. Hai stuurde twij van zien leerlingen der op oet ² mit bosschop: "Goat noar t loug hier tegen joe over. Votdoalek as ie der in kommen, zel ie der n vool vinden. Hai is vaastbonden. Nog nooit het ter n mensk op zeten. Moakt hom lös en brengt hom hier heer. ³ En as ain tegen joe zegt: 'Wat mout dat doar?', den mout ie zeggen: 'De Heer mout hom bruken. Hai zel hom vot weerom brengen.'" ⁴ Ze gingen der op oet, vonden t vool vaastbonden bie n boetendeur en muiken hom lös. ⁵ "Wat mout dat doar?", raipen gounent van lu dij doar omhingen. "Woarom moak ie dij vool lös?" ⁶ Ze gavven heur beschaaid wat Jezus heur besteld haar. Dou luiten lu heur geworden. ⁷ Ze brochten t vool bie Jezus en legden heur mantels der over hèn. Hai ging der op zitten.
⁸ Veul mensken vlijden heur mantels oet op weg en aandern deden t zulmde mit gruin dat ze van t laand hoald haren. ⁹ Dij veuroet laipen en dij achteraan kwammen, raipen:

"Hosanna! Hoog te priezen is Hai
dij komt in de Heer zien noam.
¹⁰ Hoog te priezen is t keunenkriek
van Doavid ons Voader,
t riek dat komt.
Hosanna in hoogste hemel!" ¹³

¹¹ Zo trok E Jeruzelem in, noar tempel. Dou E alles goud bekeken haar, ging E mit de Twaalm noar Betanie. t Was al loat worden.