Maarcus 10

Gods Riek ingoan

¹³ Mensken brochten lutje kinder bie Hom. Bedoulen was, dat Hai heur aankommen zol. Mor leerlingen foeterden heur oet. ¹⁴ Dou Jezus dat vernam wer E lèlk in hoed: "Dij kinder maggen bèst bie Mie kommen! Keert ze toch nait! Veur zukkent is Gods Keunenkriek ja! ¹⁵ Zeker woar, Ik zeg joe: Wèl of Gods Keunenkriek nait aannemt as n kind, dij komt ter wis nait in!" ¹⁶ Hai sluig aarms om heur tou, legde heur handen op en zegende heur.
¹⁷ Dou E weer op pad ging, kwam der ain op n draf aanlopen, vuil veur Hom op knijen en vruig: "Goie Meester, wat mout ik doun dat ik t aiwege levent krieg?" ¹⁸ "Woarom nuim ie Mie goud?", vruig Jezus. "Gainain is goud, of t mos God al wezen. ¹⁹ Ie kennen de geboden: 'Moord nait, wees nait ontraauw, steel nait, gain vaalze verkloaren ofleggen, gain mensk tekört doun, joen pa en moeke hoog holden.'" ¹² ²⁰ "Meester", zee e, "doar heb ik mie aaltied aan holden, van jongs òf aan." ²¹ Jezus keek hom aan, mog hom vot geern lieden en zee: "Der mekaaiert bie joe nog ain ding aan: verkoop aal wat ie hebben en geef t geld aan aarme lu. Dén zel ie n kaptoal in hemel hebben. Kom den weerom en goa achter Mie heer." ²² Dou e dat heurde, wer e kant sneu. Mismoudeg ging e vot - hai was ja aibels riek.
²³ Jezus keek kring rond en zee tegen zien leerlingen: "Wat is t veur rieke mensken toch stoer om in Gods Riek te kommen!" ²⁴ Leerlingen wazzen kant riddersloagen deur wat of E doar zee. Doarom zee Jezus vannijs tegen heur: "Jonges, wat is t toch stoer om in Gods Riek te kommen! ²⁵ t Is makkelker veur n kemeel deur t oog van n naal te kroepen as veur n rieke man om in Gods Keunenkriek te kommen." ²⁶ Dou wazzen ze haildáál verbiesterd! "Wèl kin den nog red worden?", vruigen ze. ²⁷ Jezus keek heur aan. "Bie mensken kin dat ook nait", zee E, "mor bie God aal. Bie God kin ja alles!" ²⁸ Dou begunde Petrus: "Mout Ie ais lustern: wié hebben aal onzent ter aan geven en binnen achter Joe heergoan." ²⁹ "Ik verzeker joe", antwoordde Jezus, "elkenain dij om Mie en om bliede bosschop ofstand doan het van hoes, bruiers en zusters, moeke, pa, kinder of laand, ³⁰ dij krigt nou al honderdmoal zo veul weerom aan hoezen, bruiers en zusters, moekes, kinder en laanderijen. Mor dat gaait nait zunder dat men achternoa zeten wordt. En mittertied krigt e t aiweg levent. ³¹ Voak zellen eersten de lesten wezen, en lesten de eersten.