Maarcus 10

Over oftraauwen

¹ Jezus ging doarvandoan noar kontrainen van Judeoa en aander kaant Jordoan. Nog ais kwam der n tjucht volk mit nkander op Hom òf. En zo as aaltied, gaf E heur onderricht.
² (Der kwammen ook Farizeeërs aanzetten.) ⁹ Ze vruigen: "Mag n man zien vraauw vot sturen?" Dat zeden ze om Hom oet te perbaaiern. ³ "Wat het Mozes joe veurschreven?", vruig E. ⁴ "Mozes het ons permizzie geven n schaaidensbraif te schrieven en doar kin je heur den mit votsturen", antwoordden ze. ¹⁰ ⁵ "Wait ie woarom Mozes joe dit veurschrift geven het?", vruig Jezus. "Omdat ie zukse haarde koppen hebben! ⁶ Mor van t begun òf, dou eerde moakt wer, het Hai heur as man en vraauw moakt. ⁷ Doarom gaait n man bie zien pa en moeke vandoan (om t bie zien vraauw te holden)9, ⁸ van dij gevolgen dat ze nait meer twij, mor volsloagen ain binnen. ⁹ Wat God onder ain juk brocht het, mout gain mensk van nkander hoalen." ¹¹
¹⁰ Dou ze weer thoes wazzen, kwammen leerlingen der op weerom. ¹¹ Hai zee tegen heur: "Wèl zien vraauw votstuurt en mit n aander traauwt, brekt veur heur zien traauw. ¹² En as zai bie heur man vandoan gaait en mit n aander traauwt, den is ze ontraauw."