Maarcus 1

Mensken beder moakt in Kafárnaüm

²¹ Ze trokken noar Kafárnaüm. De eerste de beste sabbat ging E in sinegoge onderricht geven. ²² Lu heurden der slim van op: Hai gaf heur ja onderricht as n man van gezag en nait zo as schriftgeleerden deden.
²³ Nou was ter krekt ain in sinegoge dij bezeten was deur n onnure gaist. Kerel bèlkte: ²⁴ "Wat wil Ie van ons, Jezus van Nazeret? Bin Ie kommen om ons te vergraimen? Ik wait wel, wèl of Ie binnen: haailege van God!" ²⁵ Jezus trovvelde hom òf: "Hol die stil! Goa oet hom vandoan!" ²⁶ Onnure gaist schudde man hènneweer van wonder en geweld en mit veul gebeer ging e oet hom vandoan. ²⁷ Ze wazzen haildaal verhilderd en d'ain vruig d'aander òf: "Hei-je der nou verstand van! n Nije leer mit gezag! Alderdeegs onnure gaisten bestelt E en ze doun wat E zegt!" ²⁸ Zien foam ging in hail Galileoa rond as n lopend vuurtje.
²⁹ Ze gingen votdoalek noar boeten, tou sinegoge oet, en kwammen mit Jakobus en Johannes in Simon en Andreas heur hoes. ³⁰ Simon zien schoonmoeke lag mit koors op bèr en vot begunden ze der mit Hom over. ³¹ Hai ging noar heur tou, pakte heur bie haand en hulp heur in t èn. Koors verswon en zai bedainde heur.
³² t Wer oavend, zun ging onder en mensken brochten dij der min aan tou wazzen en dij te lieden haren van onnure gaisten, altmoal bie Hom. ³³ Haile stad laip veur deur op n bult. ³⁴ Hai muik n bult lu beder dij der min aan tou wazzen van aalmeugelke soorten kwoalen en veul onnure gaisten dreef E oet. Mor Hai luit onnure gaisten nait vertellen, dat zai wozzen wèl of Hai was.
³⁵ Hail vro - t was nog duuster - ging E van bèr òf noar boeten tou, en ging op pad noar n ainzoame stee. Doar beedde Hai. ³⁶ Simon en zien kammeroaden gingen Hom achternoa. ³⁷ Dou ze Hom vonden haren, zeden ze: "Ze zuiken altmoal noar Joe!" ³⁸ Hai antwoordde: "Loat we woaraargens aans hèn goan, noar dörpen in omtrek tou. Doar mout Ik t grode nijs ook bekend moaken. Mit dát doul was Ik ter ja op oet goan." ³⁹ En Hai preekte in heur sinegoges en dreef onnure gaisten oet, hail Galileoa deur.