Maarcus 1

Begun

¹ Hier begunt goie bosschop van Jezus Christus, God zien Zeun. ² Zo as ter bie perfeet Jesajoa schreven staait:
"Kiek! Ik stuur mien bode veur joe oet,
dij joe boan vrij moaken zel.¹
³ Heur! Der ropt ain in woestijn:
'Moakt boan vrij veur de Heer,
moakt poaden recht veur Hom!'" ²
⁴ Zo ging Johannes te waark: hai deupte in woestijn en verkundegde dat ze zok, as taiken van bekeren, deupen loaten mozzen. Den zollen zunden heur vergeven worden. ⁵ Hail Judeoa en ale lu oet Jeruzelem gingen op hom òf. Ze luiten zok deur hom deupen in Jordoan en kwammen rondoet veur heur zunden oet.
⁶ Johannes haar n klaid aan van kemelehoar, mit n leren raim om t lief. Hai leefde van sprinkhoanen en hunneg van wilde iemen. ⁷ Hai verkundegde: "Noa mie komt Ain, dij meer maans is as ik. Ik bin nog te min om mie deel te boegen om zien schounraimen lös te moaken. ⁸ Ik heb joe deupt mit wotter, mor Hai zel joe deupen mit Hillege Gaist."
⁹ Doudestieds kwam Jezus oet Nazeret in Galileoa en Hai wer deur Johannes in Jordoan deupt. ¹⁰ Mit dat E tou t wotter oetkwam, zag E hemel openbreken en de Gaist as n doef op Hom deelstrieken. ¹¹ En der klonk n stem tou hemel oet: "Doe bist mien laive Zeun, doar Ik zo wies mit bin!" ¹² Op slag dreef de Gaist Hom vot, woestijn in. ¹³ Vatteg doag bleef E doar. Hai wer deur Soatan oetperbaaierd, leefde doar maank wilde daaier en engels stonden veur Hom kloar.
¹⁴ Noadat Johannes oppakt was, ging Jezus in Galileoa goie bosschop van God verkundegen. ¹⁵ Hai zee: "Tied is ter heer! Gods Keunenkriek is stoefbie! Begunt n nij levent en holdt joe aan goie bosschop!"