Judas 1

Vaalze leroars

³ Laive mensken!
k Was al flink op streek joe te schrieven over doar ie en wie vrij van kommen binnen en doar wie altmoal paart aan hebben. Mor dou kwam t mie in t zin: ik kon joe mor beder aanpittjen te strieden veur t geleuf, dat ie veurgoud as haailegden overleverd kregen hebben. ⁴ Der binnen ja bepoalde lu binnen slopen, lu, doar t oordail al laank over vaaststeld is. Goddeloze mensken binnen t. Ze moaken misbruuk van God zien genoade en leven der mor op lös. Ons ainegste Heer en Meester doar willen ze niks van waiten.
⁵ Ook al wait ie dat altmoal al, k wil joe dit toch nog ais in t zin brengen, dat de Heer zien volk oet Egypte bevrijd het. Mor toch het E loater lu verdoan, dij t nait vertraauwden. ⁶ Ook engels, dij heur hoge ploats nait vaastholden en heur aigen stee verloaten hebben, het Hai veur aiweg en aaid in t routduustern vaastzet. Doar mouten ze grode dag van t oordail ofwachten. ⁷ Denkt ook ais aan Sodom en Gomorra en steden der omtou! Net zo as dij engels, bedreven ze ontucht en gavven ze tou aan lusten dij tegen noatuur ingingen. Doar liggen ze nou as veurbeeld: lieden mouten ze onder t aiwege vuur. Dat is heur straf!
⁸ Krekt as dizze lu mit heur gedreum. Ze moaken misbruuk van heur aigen liggoam. Gezag willen ze niks van waiten en lastern doun ze hemelse machten. ⁹ Dou oartsengel Michaël hikhakkerij haar mit duvel over Mozes zien liggoam, haar e moud ter nait tou hom te veroordailen. "Nee", zee e, "de Heer mag die stravven!" ¹⁰ Mor dizze mensken hebben gek mit zoaken doar ze gain verstand van hebben. Net as stomme daaier hebben ze allenneg mor wait van heur aigen noatuur. En dat wordt heur ondergang! ¹¹ O wai, o wai! Ze binnen t pad van Kaïn opgoan. Net as Bileam, dij veur geld alles wel doun wol, binnen zai der ook veur besweken. En net as Korach kwammen ze der bie om haals, mit heur dwaarsdrieverij. ¹² t Is schandoaleg hou of ze moaltieden bedaarven, dij ie mit nkander holden. t Is heur allenneg om t eten en drinken te doun. Schoamen doun ze zok naargens veur. t Binnen net wolken: wind drift ze over en wotter komt ter nait van. Bomen bie haarstdag, zunder vrucht, stìndood en gain worrels! ¹³ Joa, net woeste golven op zee. t Schoem van heur schaande spittert omhoog. Dwoallichten binnen t. In t routduustern kommen ze te lande, veur aiweg en aaid!
¹⁴ Over heur het Henoch, zeuvende van Oadam òf, veurzegd: "Kiek! De Heer is kommen mit zien haailege tiendoezenden." ¹⁵ Over ale lu zel Hai rechtspreken en goddeloze mensken stravven veur ale goddeloze dingen dij ze bedreven hebben, en veur grode mond dij ze tegen Hom opzet hebben. ¹⁶ Dat binnen de lu, dij aaltied vranterg binnen, dij zoezen over heur lot. Ze doun heur aigen zin. Mond staait heur noar grode woorden. En mooi proaten dat ze mit mensken doun! As ze der mor beder van worden!