Johannes 9

¹ Dou e wieder ging, zag e onderwegens n man dij bie zien geboorte al blind was.
² "Rabbi," vruigen zien leerlingen, "wèl het ter verkeerd doan, dat e blind geboren is? Hai of zien ollu?" ³ Jezus zee: "Zien blindhaid het niks van doun mit wat hai of zien ollu verkeerd doan hebben. Hai is blind om ons zain te loaten wat of God apmoal kin. ⁴ Zolaank as t daglicht ter is, mout wie dounde wezen mit t zulmde wat of hai dut, dij mie stuurd het. Den wordt t naacht en is t niks weerd om te waarken. ⁵ Zolaank k nog bie mensen bin, bin k t licht veur heur."
⁶ Dou e dat zegd haar, spijde hai op grond, muik ter wat smurrie van en smeerde dij op man zien ogen. ⁷ "Goa t ter mor ofwasken in badhoes Siloäm," zee e dou tegen hom. Siloäm betaikent: >Stuurd.' Man ging der hèn, wosk zien gezicht en dou e weerom kwam, kon e zain. ⁸. Zien noabers en lu dij hom vrouger zulm as bedelder kend haren, vruigen den ook: "Is dat kerel nait, dij altied zat te schooien?" ⁹ "Joa, dat is hom," zeden gounent, mor aandern zeden: "Nee, t is hom nait, hai liekt ter op." Man zulm zee dou: "Ik bin t aal!" ¹⁰ Ze vruigen: "Mor hou bestaait t dast in ains zain kinst?" ¹¹ Hai zee: "n Man B Jezus hait e B muik wat smurrie en smeerde dat op mien ogen. Dou zee e tegen mie, k mos noar Siloäm goan en t ter weer ofwasken. Dou k hèn goan was en t ter ofwosken haar, kon k weer zain." ¹² Zai vruigen hom: "Woar is dij man?" "Dat wait k nait," zegt e.
¹³ Dou brochten ze man dij blind west haar noar Farizeeërs tou. ¹⁴ Nou was t net sabbat, dou Jezus smurrie moakt haar en man van zien blindhaid ofholpen haar. ¹⁵ Ook Farizeeërs vruigen hom, hou of t kwam dat e inainen zain kon. "Hai dee mie wat smurrie op ogen," zee e, "dou mos k dat ter weer ofwasken en nou kin k zain." ¹⁶ n Stok of wat Farizeeërs zeden: "Hai holdt sabbat nait; den kin dij man nait bie God votkommen." Mor aandern zeden: "Hou kin ain dij zo slecht is zokse taikens zain loaten?" Ze wazzen t haildaal nait mit nkander ains. ¹⁷ "Wat vindst zulm van hom?" vroagen Farizeeërs vannijs. "Doe bist ja dij e t licht in ogen weerom geven het!" "Hai mout wel n profeet wezen," zee e.
¹⁸ Jeuden wollen der nait aan dat man altied blind west haar en nou in ainen weer zain kon. Doarom luiten ze zien ollu kommen. ¹⁹ Ze vruigen heur: "Is dit joen zeun en beweer ie dat e van kindsdoagen òf blind west het? Hou kin t den dat e nou aal zain kin?" ²⁰ "Wie waiten dat dit ons zeun is en ook dat e blind geboren is," zeden zien ollu. ²¹ "Mor wat ter gebeurd is dat e nou zain kin of wèl hom van zien blindhaid ofholpen het, doar wait wie niks van. Mor vroag hom t zulm, hai is maans genog om t zulm te zeggen!" ²² Zien ollu deden dit omreden ze wazzen baang veur Jeudse laaiders; dij haren al mit nkander ofproat: "Elk dij Jezus as Messias erkennen zol, huift hier nait weer in sinegoge te kommen." ²³ Doarom haren zien ollu zegd: "Hai is maans genog om t zulm te zeggen."
²⁴ Aandermoal luiten ze man dij blind west haar bie heur roupen. Ze zeden: "Sweer dast woarhaid zeggen zelst! Wie veur ons waiten dat dij man n minne is." ²⁵ "Of e deugt of nait, dat wait k nait," zee e, "mor ain ding wait k aal: eerst was k blind en nou inainen kin k zain." ²⁶ Dou zeden ze: "Wat het e den mit die doan? Hou het e dien ogen beter moakt?" ²⁷ Hai zee: "Dat heb k joe al zegd, mor ie lustern ja nait. Woarom wil ie t nou nog weer heuren? Ie willen toch gain leerlingen van hom worden, net as dij aandern?" ²⁸ Dou raagden ze hom oet en zeden: "n Leerling van hom! Dat bist zulm! Mor wie, wie binnen Mozes zien leerlingen! ²⁹ Van Mozes wait wie dat God mit hom proat het, mor dizze, wie waiten èns nait woar of e vot komt!" ³⁰ "Dat is ja vremd," zee man, "dat ie nait waiten woar of e vot komt! En hai het mie t licht in ogen weer geven! ³¹ Wie waiten toch van God, dat e nait lustert noar wèl nait deugt, mor aal noar dij ontzag veur hom het en dij leeft zo as hai t geern zigt. ³² t Is ja nog nooit veurkommen dat ogen van ain dij blind geboren is, beter moakt binnen! ³³ As dij man nait bie God votkommen was, haar e hier haildaal niks kloar kriegen kind." ³⁴ Dou zeden ze tegen hom: "Doe bist n minhoed van dien geboorte òf aan en doe wilst ons wat vertellen?" En ze smeten hom boeten deur.
³⁵ Jezus heurde dat ze hom boeten deur smeten haren. Hai keek of e hom zag en dou e hom gewoar wer, vruig e hom: "Doe den, hestoe vertraauw in Menskenzeun?" ³⁶ Hai zee: "Vertel mie den toch wèl dat is, meneer, dén kin k eerst vertraauw in hom kriegen." ³⁷ Jezus zee: "Hai staait veur die. Dij mit die te proaten staait, dat is hom." ³⁸ "k Vertraauw joe, meneer," zee man en ging veur hom op knijen liggen.
³⁹ Dou zee Jezus: "Ik bin noar mensen toukommen om onderschaaid tussen heur oetkommen te loaten. Wèl nait zain kin, zel dén zain kinnen en dij zain kinnen, zellen blind worden." ⁴⁰ Paardie Farizeeërs dij stoef bie hom stonden, heurden dit. "Ie mainen toch nait dat wie ook blind binnen?" vruigen ze. ⁴¹ Jezus zee: "As ie echt blind wazzen, wer joe t nait aanrekend, mor nou ie zeggen: 'Wie kinnen aal zain,' wordt joe t aal aanrekend.