Johannes 7

¹ Hiernoa bleef Jezus nog n tied van dörp tot dörp rondtrekken in Galilea. In kontrainen van Judea wol e dat nait doun, omreden Jeudse lu dij t veur t zeggen haren, wazzen der op oet hom om haals te brengen. ² In tied ston t Jeudse Loofhuttenfeest der aan te kommen. ³ Jezus zien bruiers zeden den ook tegen hom: "Most hier nait blieven. Judea, doar most wezen. Den kinnen dien leerlingen doar ja ook zain wat ofst apmoal dust! ⁴ Ast bekend worden wilst, most zain loaten wat ofst dust! Dust dit ja apmoal aal: loat t elk den toch ook zain!" ⁵ Alderdeegs zien bruiers haren gain feduutsie in hom! ⁶ "Mie komt t nou nog nait oet," zegt Jezus, "mor joe komt t altied wel oet. ⁷ t Is nait meugelk dat mensen joe hoaten. Mie hoaten ze aal, omreden ik loat heur zain, dat heur menaaier van doun verkeerd is. ⁸ Goan ie mor noar dat feest. Ik goa nait. Ik bin der nog nait kloar veur." ⁹ Zo gaf e heur beschaaid. Zulm bleef e in Galilea.
¹⁰ Mor zo gaauw zien bruiers noar t feest ofraaisd wazzen, ging Jezus der zulm ook op òf. Hai wol nait opvalen, doarom ging e zunder dat mensen deur haren wèl of e wel was. ¹¹ Jeudse laaiders keken op t feest al noar hom oet. "Woar blift dij toch?" vruigen ze. ¹² Onder t volk wer der drok over hom aggewaaierd. Paardie lu zeden: "t Is n kerel oet ain stok!" "Nee," vonden aander lu, "hai brengt mensen op biesterboan." ¹³ Mor gainent zee dat haardop, bunzelachteg as ze wazzen veur Jeudse laaiders.
¹⁴ Eerst dou t feest op haalfschaid was, ging Jezus noar tempel tou. Doar gaf e aalgedureg onderwies. ¹⁵ Jeudse laaiders stonden der versteld van en zeden: "Hou wait hai dit apmoal? Hai het ter èns nait veur deurleerd." ¹⁶ "Wat ik mensen veurhol, heb k nait van miezulm," zee Jezus, "t komt van dij mie stuurd het. ¹⁷ As ain der op oet is om te doun wat God wil, den komt e der zulm wel achter of wat k joe veurhol bie God vot komt of dat k t zulm opbedocht heb. ¹⁸ Wèl op aigen gezag sprekt, is t om zien aigen eer te doun. Mor wèl t te doun is om eer van dij hom stuurd het, dij is betraauwboar. Zokkent zit gain spier kwoad bie. ¹⁹ Wet heb ie van Mozes kregen, nait den? En gainain holdt zok ter aan. Woarom perbaaier ie mie den om t leven te brengen?"
²⁰ "Ie binnen stoapelgek," zee t volk, "wèl wíl joe den oet tied helpen?" ²¹ "Ain grode doad heb k doan," zee Jezus, "en ie kieken der mit verstand noar. ²² Doudestieds het Mozes opdracht geven jonges te besnieden - aiglieks was t Mozes nait, mor joen veurolders dij der mit begonnen binnen -, en alderdeegs op sabbat dou ie dat! ²³ As ain op sabbat besneden worden mag, omreden wet van Mozes wordt aans nait noakommen, woarom bin ie den zo kwoad op mie omreden k heb op sabbat ain haildaal beter moakt? ²⁴ Ie mouten nait aalweg oordailen noar wat je zain. Kiek hou t in t echt in mekoar zit en goa doar noar vot."
²⁵ n Stok of wat Jeruzelemmers zeden dou: "Dat is toch dij man dij ze noar t leven stoan? ²⁶ En nou staait e doar zomor vrijoet te proaten, zunder dat ain der wat tegen inbrengt. Ons laaiders binnen toch nait denken goan, dat hai Messias is? ²⁷ Hou kin dat nou: as dij Messias komt, den wait gainain woar of e vot komt. Van dizze waiten wie t ja aal."
²⁸ Dou vuil Jezus tegen heur oet - intied nog aal aan t onderwiezen in tempel - : "Ie waiten wèl of ik bin? En ie waiten ook ales over mien komòf? Mor dou der denk om: nait oet miezulm bin k kommen. Der is ain dij mie stuurd het, en op hom kin je aan. Ié kennen hom nait, ²⁹ mor ík aal: Ik kom ja bie hom vot, hai het mie hier hèn stuurd."
³⁰ Dou wollen ze hom geern pakken. Mor der was gainain dij hom griepen dee: t was zien tied nog nait.
³¹ Mor van t gewone volk kregen der n bult feduutsie in hom: "Messias, as dij komt," zeden ze, "zel wis nait méér bewiezen levern kinnen, as hai al doan het!"
³² Farizeeërs kregen in de goaten dat t volk hier t onder mekoar over haar. Doarom stuurden zai, soamen mit hogepriesters, tempelplietsie op hom òf om hom op te pakken. ³³ "k Bin nog mor n luk schòftke bie joe," zee Jezus. "Den goa k vot, weerom noar dij mie stuurd het. ³⁴ Ie goan vast nog wel noar mie op zuik, mor vinden zel je mie nait. Woar ik hèn goa, doar kin ie nait kommen."
³⁵ Jeudse laaiders zeden dou bie zokzulm: "Woar zol e den toch hèn goan, dat wie hom alderdeegs nait vinden kinnen? Hai zel toch nait in t zin hebben noar steden in t boetenlaand tou te goan, om doar aan dij Grieken onderwies te geven? ³⁶ Wat zol e toch mainen mit: 'Ie goan vaast nog wel noar mie op zuik, mor vinden zel je mie nait' en 'Ie kinnen nait kommen woar ik hèn goa?'"
³⁷ Op leste dag van t feest, dat is t hoogtepunt ter van, ston Jezus nog aalweg in tempel. Dou raip e zo haard as e kon:
"Elk dij dörst het, kom mor hier, om te drinken!
Vertraauw mor op mie!
³⁸ Over zonent wer schreven:
Zien haart zel n wèl wezen,
doar stromen wotter oetkommen doar je van in leven blieven!"
³⁹ Hai bedoulde doar de Gaist mit. Lu dij vertraauw in hom haren, zollen dij Gaist kriegen. God haar dij dou ja nog nait geven: omreden Jezus haar nog nait ereploats kregen dij hom toukwam.
⁴⁰ Van aal dij mensen dij hom dit zeggen heurd haren, wazzen der dij zeden: "Dit is eerlieks profeet dij kommen zol." ⁴¹ Aandern zeden: "Hai is Messias." Weer aandern: "Mor dij komt toch nait van Galilea heer? ⁴² Der staait ja in Bouken dat Messias van Doaved stamt en van Bethlehem kommen zel, doar Doaved ook weg kwam."
⁴³ Zo kwam der onder t volk dikke rebulie over wèl of e aiglieks was. ⁴⁴ Der wazzen gounent dij hom griepen wollen, mor gainain dij t dee.
⁴⁵ Tempelplietsie kwam dus weerom bie hogepriesters en Farizeeërs. Doar kregen ze te heuren: "Woarom heb ie hom nait opbrocht?" ⁴⁶ "Wie binnen nog nooit ain tegen kommen dij zien mond zo goud op stee het as hai." zeden ze. ⁴⁷ "t Is toch nog nait zo wied, dat e ook joe van wies brocht het?" vruigen Farizeeërs. ⁴⁸ "Der is toch ook gainain van laaiders of van Farizeeërs, dij feduutsie in hom kregen het? ⁴⁹ Aal dij lu ook, dij èns nait waiten wat ter in wet staait, je zóllen ze wat!" ⁵⁰ Mor ain van heur, Nikodemus, man dij vrouger al ais bie Jezus laans west haar, zegt: ⁵¹ "Volgens dij wet van ons, kinnen wie ja gain ain veroordailen of hai mout eerst verheurd worden en t mout dudelk wezen woar of e mit dounde is."
⁵² "Doe komst toch zeker ook nait oet Galilea?" zeden ze tegen hom. "Trek t mor noa en zelst zain, dat ter oet Galilea gain profeet komt."

⁵³ Dou ging elk op hoes aan,