Johannes 5

¹ Dou der ais n Jeuds feest was, ging Jezus noar Jeruzelem tou. ² In dij stad ligt stoefbie Schoapspoort n badhoes, op zien Hebreeuws Betzata; t het vief gallerijen. ³ In dij gaangen lag t vol mit zaiken: blinden, kreupeln en lammen. ⁵ Doar was n man bie dij al achtendatteg joar zulmde kwoal haar. ⁶ Jezus haar hom liggen zain en kwam der achter dat man al zo laank zaik was. Hai vragt hom: "Wil ie geern beter worden?" ⁷ "Meneer," zee zaike man, "k heb ja gain mensk om mie t wotter in te helpen as dat in bewegen komt. As ik den onderwegens bin, let n aander zok al in t wotter zakken." ⁸ Jezus zegt tegen hom: "Kom in t èn, krieg joen metras en goa mor ais aan loop!"
⁹ Man was votdoalek vereg; hai kreeg zien metras en ging aan loop. Mor dij dag was t sabbat! ¹⁰ Jeudse laaiders zeden tegen man dij weer beter moakt was: "t Is sabbat en dén magst dien metras èns nait oppakken." ¹¹ Hai gaf beschaaid: "Dij mie weer beter moakt het, zee tegen mie: 'Krieg joen metras en goa mor ais aan loop.'" ¹² "Wèl was t den wel dij dat tegen die zegd het?" vruigen ze. ¹³ Mor man dij weer beter moakt was, wis nait wèl t west haar, omreden Jezus was stiekem tussen t volk doar verswonnen. ¹⁴ Loater treft Jezus hom in tempel. Hai zee tegen hom: "Luster ais! Ie binnen nou weer beter; mor hol nou op mit verkeerd doun, aans wordt t nog slimmer mit joe!"

¹⁵ Man ging vot en vertelde Jeudse laaiders dat Jezus t west haar dij hom beter moakt haar. ¹⁶ Omreden Jezus dit op sabbat doan haar, gingen zai achter hom heer.
¹⁷ Mor Jezus zee tegen heur: "Mien voader waarkt aalweg en doarom dou ik dat ook." ¹⁸ Jezus ging dus nait allenneg tegen sabbatregels in, mor zee ook nog dat God zien aigen voader was en stelde zok doarmit aan God geliek. Dat was veur Jeudse laaiders nog meer aanlaaiden om hom dood te moaken.
¹⁹ "Neem dit van mie aan," zee Jezus tegen heur, "n zeun kin op aigen gezag niks doun; hai dut allenneg wat e zien voader doun zigt. Wat dij dut, dut zien zeun krekt zo. ²⁰ Mien voader is ja wies mit zien zeun en let hom ales zain wat of e zulm dut. Hai zel hom nog vernoamer dingen zain loaten. Doar zel ie nog versteld van stoan! ²¹ Net as mien voader doden opstoan let en weer leventeg moakt, krekt zo moak ik weer leventeg wèl of ik wil. ²² Mien voader oordailt ja gainent, mor aal t oordailen het e aan mie aanvertraauwd, ²³ mit bedoulen dat elkenain mie hoog het, krekt geliek as ze mien voader hoog hebben. Wèl mie nait hoog het, het mien voader ook nait hoog! En dij is t ja dij mie stuurd het!
²⁴ Neem dit van mie aan: wèl goud noar mie lustert en vertraauwt op dij mie stuurd het, het nou t aiweg levent al. Dij komt nait veur t gerecht, mor het overstap oet dood noar t levent al moakt. ²⁵ Neem dit mor van mie aan: Tied komt, ja t is al zo wied, dat dode mensen stem van God zien zeun heuren zellen. Aal dij noar hom lusterd hebben, zellen weer leventeg worden. ²⁶ Zo as mien voader zulm levenswèl is, zo het hai ook n levenswèl moakt van mie, zien zeun. ²⁷ Ook mag k van hom rechtspreken, omreden k bin ja 'Menskenzeun.' ²⁸ Kiek ter mor nait roar van op: der komt n tied dat aal dij sturven binnen mie roupen heuren zellen ²⁹ en te t graf oetkommen: mensen dij doan hebben wat God vruig, zellen leven, mor dij der dwaars tegenin goan binnen, zellen t oordail te heuren kriegen.
³⁰ Op aigen gezag kin ik niks doun; zo as God mie t zegt, zo oordail k. Mien oordail is zuver. k Dou ja nait mien aigen zin, mor wat God wil dij mie stuurd het, dat dou k.
³¹ As ik n verkloaren over miezulm ofleg, is dat nait deurslaggevend; ³² mor der is nog ain dij n verkloaren over mie oflegt en ik wait veurvaast dat dij verkloaren woar is. ³³ Ie hebben mensen noar Johannes stuurd en hai het woarhaid over mie sproken. ³⁴ Nait dat ik n verkloaren van n mensk neudeg heb, mor k zeg zukswat veur joen behold. ³⁵ Johannes was dij braandende lanteern dij licht oetstroalde en ie hebben der wel n zetje plezaaier van had.
³⁶ Mor ik heb nog n verkloaren en dij is belangrieker as Johannes zienent; kiek mor wat k dou. t Waark dat k van mien voader tot t èn tou kloar moaken mout, doaraan kin je zain dat mien voader mie stuurd het.
³⁷ Wèl of ik bin, doarover het hai, dij mie stuurd het, zulm ja n verkloaren oflegd. Ie hebben hom nooit heurd en waiten ook nait hou of e der oetzigt. ³⁸ Zien bosschop zegt joe ja niks, omreden ie vertraauwen hom nait dij hai stuurd het. ³⁹ Ie pluzen bouken oet, en denken dat ie doar t aiwege levent in kriegen kinnen. En dat dij nou net over mie goan, heb ie nait in de goaten. ⁴⁰ Mor bie mie wil je nait kommen veur t aiwege levent.
⁴¹ Wat of mensen der apmoal van moaken, doar heb k gain bosschop aan. ⁴² Mor k heb joe wel deur: laifde veur God heb ie nait echt. ⁴³ Mien voader het mie stuurd, mor mie huif ie nait! Wèl ain dij ons nait stuurd is en veur zokzulm proat. ⁴⁴ Hou kin je leuven as je allenneg bie mekoar te roade goan, en joe nait ofvroagen wat of God maint.
⁴⁵ Denk mor nait dat ík t bin dij joe bie mien voader aankloagen zel. Nee, dat is Mozes, doar ie alderdeegs joen hoop op zet haren. ⁴⁶ As je Mozes vertraauwen deden, zol je mie ook vertraauwen; over mie het hai ja schreven. ⁴⁷ Mor as je gain vertraauw hebben in Mozes zien bouken, hou zel je den vertraauw hebben in wat ik aalvot zeg?"