Johannes 2

¹ Twij doagen loater begunde der n bruloft in t Galilese dörp Kana. Jezus zien moeke was doar te gast; ² ook Jezus en zien leerlingen wazzen veur dij bruloft nuigd. ³ In ainen was wien op. Den zegt zien moeke tegen hom: "Wien is op!" ⁴ "Wat heb wie der mit te moaken!" zegt Jezus, "k heb t nog nait zo wied." ⁵ Mor toch zegt zien moeke tegen lu dij bedainden: "Ie mouten mor ales doun wat of e zegt."
⁶ Der stonden doar zès stainen wottervoaten, elk van zo'n tachteg tot honderdtwinneg kaan, veur as Jeuden zok zuvern mozzen. ⁷ "Gooi dij voaten ais vol wotter!" zegt Jezus tegen heur. Dou goten ze dij aan kop tou vol. ⁸ "Schep ter nou mor wat oet," zegt e, "en breng dat noar ceremoniemeester." Dat deden ze. Man wos nait wat ter gebeurd was; lu dij bedainden en t wotter oetschept haren, wozzen t aal. ⁹ As ceremoniemeester t wotter, dat wien worden was, pruifd het, ropt e brudegom bie zok ¹⁰ en zegt tegen hom: "Elkenain schenkt eerst goie wien en mindere as lu aanschoten binnen. Mor ie hebben beste wien aan t leste tou opbewoard!"
¹¹ Doar, in Kana in Galilea, gaf Jezus t eerste sienjoal om zain te loaten hou veurtrevvelk of e was. Zien leerlingen kregen den ook feduutsie in hom. ¹² Dou laip Jezus mit zien moeke, zien bruiers en zien leerlingen, omdeel noar Kafarnaüm tou. Doar bleven ze n dag of wat.

¹³ t Laip tegen t Jeudse Pascha. Doarom ging Jezus op pad noar Jeruzelem tou. ¹⁴ Hai zag doar hou of lu in tempel koien, schoapen en doeven stonden te verkopen en geld zatten te wizzeln. ¹⁵ Hai knupte wat ènden taauw aan nkander en mit dij sweep bìnzelde hai ze apmoal te tempel oet, schoapen en koien ook. t Geld van wizzeloars smeet e op grond en toavels kiepte hai ondersteboven. ¹⁶ Tegen doevekooplu zee e: "Der oet mit joen handel! Ie maggen van t hoes van mien voader nait laanger n hoes moaken doar handeld wordt." ¹⁷ Dou schoot t zien leerlingen in t zin dat ter schreven staait:
'k Heb zo aldernoast veul mit joen hoes op,
dat k goa der aan onderdeur!'
¹⁸ Jeudse laaiders kwammen der op òf en vruigen hom: "Kin ie ons n taiken zain loaten, dat wie waiten kinnen dat ie hier t recht tou hebben?" ¹⁹ Jezus antwoordde: "Nou, sleup dizze tempel den mor en k zel zörgen dat e der in drij doagen weer staait."
²⁰ Jeudse laaiders zeden: "Zesenvatteg joar is der over doan om dizze tempel te baauwen en ie zollen hom der weer in drij doagen stoan hebben?" ²¹ Mor hai mainde mit tempel zokzulm.
²² Dou Jezus loater oet dood weer opstoan was, kwam zien leerlingen t weer in t zin dat e hier t voak over had haar en ze leufden wat in geschriften staait en wat of Jezus dou zegd haar.
²³ Dou e mit Pascha in Jeruzelem was, gavven veul lu hom heur vertraauw, om taikens dij e aalweg zain luit. ²⁴ Mor Jezus vertraauwde zokzulm nait aan heur tou, omreden hai wos hou of ze wazzen. ²⁵ Verkloarens over zokzulm haar e nait neudeg. Wat ter in n mensk stekt, dat wos hai zulm ja wel.