Johannes 17

¹ Dou Jezus dat apmoal zegd haar, muik e zok kloar om beden te goan.
"Voader," zee e, "t is nou zo wied. Bewies mie, joen zeun, aandermoal eer dij mie toukomt en doarmit zel ik, joen zeun, ook joe eer bewiezen! ² Ie hebben mie over ale mensen zeggenschop geven, om der veur te zörgen dat elkenain dij ie mie aanvertraauwd hebben, aiweg leven blieven zol. ³ 'Aiweg leven' wil zeggen dat mensen inzain dat ie ainegste echte God binnen, en dat zai mie, Jezus Christus, dij ie stuurd hebben, ook kennen. ⁴ Deur t waark tou n goud èn te brengen, doar k ook opdracht veur kregen haar, heb ik joe hier op wereld eer bewezen. ⁵ Voader, wil ie mie nou den weer bie joe weerom roupen? En mie doar bie joe hoge pesitie weer geven zo as k dij ook haar, veurdat wereld beston?
⁶ Aan lu dij ie mie oet haile wereld aanvertraauwd haren, heb k oetstokt wèl of ie binnen. t Wazzen aiglieks joen aigen mensen, mor ie haren ze ja aan mie aanvertraauwd. Zai hebben joen veurschriften noaleefd. ⁷ Ze zain nou den ook wel in dat ales wat ie mie geven hebben, oorspronkelk bie joe vot komt. ⁸ k Heb heur overbrocht wat ie mie besteld haren, en zai hebben dij bosschop van mie ook aannomen. Zai hebben op t lest inzain dat k bie joe vot kom, en zai binnen der stoadegaan van overtuugd roakt dat ie t wazzen dij mie stuurd haren.
⁹ Veur heur beed ik joe. Veur ale mensen nait, mor wel veur heur dij ie mie aanvertraauwd hebben: dat binnen ja joen aigen mensen. ¹⁰ Aal wat van joe is, is van mie. Mor ook: wat van mie is, is van joe. Mien hoge aanzain is veur heur dudelk veurndag kommen. ¹¹ k Bin aiglieks al nait meer in dizze wereld, ik bin ja al op weg noar joe tou. Mor zai blieven hier op eerde. Hillege voader, beschaarm ze toch deur zulmde macht dij ie mie ook geven hebben! Loaten ze nkander stief vaastholden, krekt zo as ie en ik doun. ¹² Zolaank k bie heur west heb, heb ik heur zulm beschaarmd, deur macht dij ie mie geven haren. k Heb over heur woakt. Gainain van heur is den ook omkommen, bloots ain dij al veurbestemd was om dood te goan. Zo was t al optaikend. ¹³ k Bin nou op weg noar joe tou. k Zeg dit apmoal, nou k nog bie mensen bin. Ze kinnen den overspould worden mit zulmde bliedschop as ik. ¹⁴ Ik heb joen bosschop aan heur deurgeven. Mensen willen niks van heur waiten: net as ik, heuren ze ja nait bie dij mensen. ¹⁵ k Vroag echt nait of ie ze te wereld oethoalen willen. Nee, dat nait, mor hol heur goud in t oog veur as ze t slim stoer kriegen. ¹⁶ Mensen van dizze wereld, doar heuren ze ja nait meer bie, netzomin as ik. ¹⁷ Loaten ze wies mit joe wezen om joen bosschop: dij is ja betraauwboar! ¹⁸ Ik stuur ze nou noar mensen tou, krekt zo as ie mie wereld instuurd hebben. ¹⁹ Ik was slim wies mit joe veur heur. Loaten zai doardeur den ook wies mit joe wezen!
²⁰ Mor k beed nait allenneg veur heur. k Beed ook veur aal dij lu dij zok deur bosschop dij ze deurgeven zellen, aan mie aanvertraauwen zellen. ²¹ Loaten ze ain wezen mit nkander, voader, net zo as wie ain binnen mit nkander. Loaten zai ook mit ons baaident verbonden wezen. Den zellen mensen der eerst recht van overtuugd roaken dat ie t binnen dij mie noar heur toustuurd hebben. ²² Dij ereploats dij ie mie geven haren, heb ik aan heur deurgeven: den kinnen ze, net as wie, ain wezen mit nkander, ²³ ik mit heur en ie mit mie. Dén eerst binnen ze haildaal ain. Mensen over haile wereld zellen zo inzain kinnen dat ie mie stuurd hebben en dat ie van heur holden, net as ie van mie holden.
²⁴ Voader, ie hebben mie t ja touzegd: Woar ik dommit bin, doar wil ik heur ook geern hebben. Den kinnen ze zain wat veur hoge pesitie ie mie geven hebben, nog veur wereld ook nog mor beston.
²⁵ Voader, ie binnen rechtschoapen. Mensen kennen joe zo nait. Ik wait aal, wèl of ie binnen. En lu hier binnen der van overtuugd roakt dat ie mie hier hèn stuurd hebben. ²⁶ k Heb heur oetstokt wèl of ie binnen. En dat zel k ook doun blieven: k wil stomme geern dat joen laifde veur mie der ook veur heur is. Zo zel ik ain wezen mit heur."