Johannes 15

¹ Echte wiendroefbos, dat bin ik, en mien voader is wienboer. ² As ain van mien ranken gain vrucht dragt, snidt e dij vot; ranken dij aal vrucht zetten, snuit e sekuur bie om ze aan te pittjen nog betere vruchten te droagen. ³ Ie binnen al biesnuid deur ales wat k joe zegd heb. ⁴ Hol mie stief vaast en ik hol joe vaast. Want bloots as ie mit mie verbonden blieven, kin ie vrucht droagen. Wiendroefrank kin ja allain dén mor vrucht droagen as ze aan wiendroefbos vaast zitten blift, nait apaart van hom!
⁵ Wiendroefbos, dat bin ik en ie binnen mien ranken. Ain dij mit mie verbonden blift, en ik mit hom, brengt veul vrucht op; mor lös van mie, brengt e niks op. ⁶ Wèl mie nait vaastholdt, wordt votsmeten net as n wiendroefrank dij ofsneden is. Dij verdreugt en mit net zoksen worden ze bie nkander haarkt, in t vuur smeten en opbraand. ⁷ As ie mie aal vaastholden en as ie doun wat of ik joe veurholden heb, den kin ie vroagen wat of ie willen, en ie zellen t kriegen. ⁸ Mien voader zel der veurvaast eer ofhoalen as ie veul vruchten droagen; doar kin ie mit zain loaten, dat ie leerlingen van mie binnen. ⁹ Ik mag joe geern lieden, net as mien voader mie geern lieden mag. Zo mout wie veul van nkander holden blieven. ¹⁰ As ie doun blieven wat k joe opdroag, blief k wies mit joe. Net zo as ik dou wat mien voader mie opdragt en hai dus wies mit mie blift.
¹¹ Mit aal wat k joe zegd heb, wil ik mien bliedschop op joe overbrengen; den zel joen bliedschop kompleet wezen. ¹² Mien bestel aan joe is: ie mouten veuraal wies mit nkander wezen, net zo as ik aaid wies mit joe west heb. ¹³ Joen levent veur joen vrunden over hebben, groder kin joen laifde ja nait wezen. ¹⁴ Mien vrunden, dat bin ie, as ie doun wat of ik joe zeg. ¹⁵ Doarom nuim k joe nait langer 'knechten'; n knecht wait ja nait wat zien boas aiglieks ommaans het. Nee, nou nuim k joe 'mien vrunden': aal wat k van mien voader vernomen heb, heb k joe ja deurgeven. ¹⁶ Ie hebben mie ja nait oetkozen, nee, ik joe! En k heb joe op pad stuurd om vrucht te droagen, blievende vrucht. Mien voader zel joe geven wat ie doarveur neudeg binnen. Mor den mout ie t hom aal in mien noam vroagen! ¹⁷ Dat is mien bestel aan joe: blief mit mekoar in ain joar!
¹⁸ Mensen zellen veurvaast t graauw op joe in hebben. Mor ie mouten mor zo denken: op mie haren ze al veul eerder t graauw in. ¹⁹ As ie bie dij mensen heurd haren, den zollen ze alderdeegs wies mit joe wezen; ie wazzen ja ain van heur! Mor dij mensen hebben nou net n ofkeer van joe, omreden ik heb joe bie heur vothoald. Aiglieks heur ie der nait meer bie. ²⁰ Denk nog ais aan wat ik joe krekt nog zegd heb: n knecht staait nait boven zien boas. Mie hebben ze achternoa zeten, dat zellen ze joe ook doun. Mensen dij zok aan mien bosschop holden hebben, zellen dat ook mit joenent doun. ²¹ Dit apmoal zellen ze joe aandoun, omreden k heb joe dit apmoal besteld. Ze kennen hom ja nait dij mie stuurd het. ²² As k nait bie heur kommen was, om heur mien bosschop over te brengen, zollen ze naargens schuld aan had hebben. Mor nou hebben ze gain verweer veur heur misvaal. ²³ Wèl van mie niks waiten wil, wil ook van mien voader niks waiten. ²⁴ As k nou nait midden maank heur doan haar, wat n aander nog nooit doan het, dén kon je heur niks moaken. Mor nou hebben ze t mit aigen ogen zain en toch hebben ze t graauw op mie in en zodounde ook op mien voader. ²⁵ Zo komt oet, wat ter in heur wet staait:
'n Dikke hekel hebben ze aan mie had!
En doar was toch zekerwoar gain reden tou?'
²⁶ As k bie mien voader bin, den zel k, doar, bie mien voader vandoan, gaist noar joe tousturen. Dij legt n verkloaren òf, op hom kin je reken. Hai zel joe gedegen biestoan, deur over mie te getugen. ²⁷ Ie mouten ook getugen: ie hebben ja van t aldereerste begun òf aan bie mie west.