Johannes 14

¹ Moak joe nou mor nait overstuur. Vertraauw nou mor op God en ook op mie. ² Mien voader het n groot hoes. Doar kinnen n bult mensen in. As dat nait zo was, zol k den tegen joe zegd hebben: 'k Goa der hèn om n stee veur joe kloar te moaken?' ³ Noatied kom k weerom om joe op te hoalen. Den zel ie ook op aigenste plak kommen doar ik den bin. ⁴ En ie waiten weg aal noar stee doar ik hèn goa."
⁵ "Mor meneer," zegt Tomas, "wie waiten ja nait woar ie hèn goan. Hou kin wie den weg doar noar tou vinden?" ⁶ Jezus zegt tegen hom: "Echte weg noar t leven, dat bin ik. Mensen kinnen allain bie mien voader kommen deur mie. ⁷ As ie ainmoal waiten wèl as ik bin, zel ie ook deur mie der achter kommen wèl mien voader is. Van nou òf aan ken ie hom, en heb ie zain wèl of hai is."
⁸ Mor Filippus zegt: "Meneer, loat ons den toch zain wèl of joen voader is; dén bin wie tevree." ⁹ Jezus zegt tegen hom: "Filippus, nou bin k al zo laank bie joe, en nog altied begripst mie nait? Wèl mie zain het, het ja tougelieks mien voader zain! Hou kinst den nog vroagen: 'Loat ons ais zain wèl of joen voader is?' ¹⁰ Leufst den nait dat ik ain bin mit mien voader, en mien voader mit mie? Wat ik tegen joe zeg, zeg k den ook nait oet miezulm, mor mien voader dij in mie woont en waarkt, dij het mie t zo besteld. ¹¹ Echt woar! Ik bin ain mit mien voader en mien voader mit mie. Leuf t dén teminnent om wat k apmoal dou.
¹² Dou der denk om: wèl op mie vertraauwt, zel t zulmde doun as ik; hai zel alderdeegs dingen doun dij nog veul méér indrok moaken. Want ik goa noar mien voader tou. ¹³ Ales wat ie in mien noam vroagen, dat zel k doun. Den zel deur mie, zien zeun, blieken hou geweldeg mien voader is! ¹⁴ As ie hom wat vroagen in mien noam, zel ik dat zeker zulm veur joe doun!
¹⁵ As ie mie geern lieden maggen, zel ie vanzulm doun wat ik zeg. ¹⁶ Ik zel mien voader vroagen of e n aander sturen wil om joe doarbie te helpen, ain dij aaltied bie joe blift, ¹⁷ gaist dij woarhaid dudelk moakt. Aander mensen kinnen hom nait kriegen, omreden ze zain hom nait en kennen hom ook nait. Mor ie kennen hom aal. Hai is bie joe introkken en blift aaid in joe.
¹⁸ k Loat joe nait as weeskinder achter. En zulm kom k ook bie joe weerom. ¹⁹ Nog n zetje, dén zain aander mensen mie nait meer. Mor ie aal, omreden ie zain aal dat ik leven blief. Ook ie zellen leven blieven. ²⁰ Den zel ie begriepen dat ik ain bin mit mien voader, en ie mit mie en ik mit joe.
²¹ Wèl mien opdrachten goud kent en zok doaraan holdt, dij mag mie geern lieden. En as ain mie geern lieden mag, mag mien voader op zien beurt hom ook geern lieden. Ook ik mag zo ain geern lieden. En dij komt te waiten wèl of ik bin: doar zel k wel veur zörgen."
²² Den vragt Judas, nait dij oet Kariot: "Meneer, hou komt t dat ie allain aan ons zain loaten wèl of ie binnen, en nait aan ale mensen?" ²³ Jezus zee: "Wèl mie geern lieden mag, zel zok holden aan wat k zeg. Mien voader het zo ain slim hoog! Mien voader en ik zellen noar hom tou goan en wie zellen bie hom intrekken. ²⁴ Mor wèl n hekel aan mie het, holdt hom nait aan wat k zeg. Aal wat ie van mie heurd hebben, binnen nait mien aigen woorden: mien voader het mie stuurd om dizze bosschop over te brengen!

²⁵ k Zeg joe dit alvast nou k nog bie joe bin. ²⁶ Mor hillege Gaist, dij mien voader op mien bestel sturen zel, dij zel joe helpen; hai zel joe ales oetstokken en der veur zörgen dat joe loater ales weer in t zin komt wat k joe verteld heb. ²⁷ 'Vrede' geef k joe as mien ofschaaidskedo. Mien vrede! Dat is n aander soort vrede as mensen geven kinnen. Moak joe nou mor nait overstuur, en veuraal nait benaauwd. ²⁸ Ie hebben ja heurd dat k zegd heb: 'k Goa nou weg, mor k kom bie joe weerom.'
Ie maggen mie ja geern lieden; wees den toch blied veur mie dat k weer noar mien voader tou goa; mien voader is ja belangrieker as ik. ²⁹ k Vertel joe nou t apmoal al. Dus nog veurdat t gebeurt. As t den zo wied is, zel ie t leuven. ³⁰ Ik heb nait veul tied meer om mit joe te proaten, want dij t in dizze wereld veur t zeggen het, komt ter aan. Over mie het e niks te zeggen; ³¹ mor ale mensen mouten waiten dat k mien voader geern lieden mag, en dat k dou wat of hai mie besteld het.
In t èn! Loat wie hier nou mor vot goan.