Johannes 12

¹ Zès doagen veur t Pascha ging Jezus noar Betanie, t dörp doar Loazerus woonde, dij e te dood oet opwekt haar. ² Ze haren doar eten veur hom kloar moakt. Marta was aan t bedainen en Loazerus zat mit Jezus maank gasten. ³ Dou pakte Maria n haile kroek vol lekker roekende baalzem, moakt van echte, dure narduseulie. Doar zaalfde ze Jezus zien vouten mit en wiste ze òf mit heur hoar. Dij baalzemgeur rook je al gaauw deur t haile hoes hèn.
⁴ Doarop zegt Judas, n man oet Kariot, ain van zien leerlingen dij hom loater aangeven zol: ⁵ "Dij roekeulie haar best drijhonderd denaries opbrengen kind! Wie haren dij sìnten ja beter aan aarme lu geven kind!" ⁶ Mor dat zee e nait omreden hai haar zoveul mit aarme lu op. Nee man, t was n daif! Hai was puutholder, en zodounde kon e aalgedureg wat in zien aigen buus stoppen. ⁷ Mor Jezus zee: "Loat heur toch mit rust. Ze het dij baalzemeulie apaart veur mien begraffenis opbewoard! ⁸ Aarme lu, dij heb ie aalweg bie joe, mor mie nait."
⁹ n Haile bult Jeuden haren der van heurd dat Jezus doar touhuil. Doarom gingen ze der ook op òf: nait bloots om Jezus, nee, ze wollen Loazerus ook wel ais zain dij e te dood oet opwekt haar. ¹⁰ Opperpriesters haren dou al plannen om Loazerus ook om te brengen, ¹¹ omreden der laipen n bult Jeuden over en gingen in Jezus leuven: ze haren ja zain wat ter mit hom gebeurd was.
¹² Aanderdoags laip t volk dat veur t Pascha noar Jeruzelem kommen was, mit paalmtoeken in haand te stad oet. Ze haren heurd dat Jezus onderwegens was noar Jeruzelem. ¹³ Dou laipen ze hom in muit. Ze raipen zo haard as ze konnen:
"Hosanna! Hoera, bode van God komt ter aan!
Keunenk dij over Izrel regaaiern zel!"
¹⁴ Dou zöchde Jezus zok n ezel op. Dou e dij vonden haar, ging e der op zitten. Zo staait t ja ook schreven:
¹⁵ 'Wees mor nait baang, Sion, mien wicht!
Doar komt dien keunenk ja aan: hai ridt op n ezelsvool.'
¹⁶ Eerste tied begrepen zien leerlingen dit apmoal nog lang nait. Loater, dou Jezus al in t hemelse licht opnomen was, kwam heur t in t zin dat dit apmoal op hom sluig en dat t doarom ook zo goan was.
¹⁷ Lu dij der bie west haren dou Jezus Loazerus te t graf oet raip en hom te dood oet opwekt haar, haren doar over verteld. ¹⁸ Doarom laipen dij hom in muit: ze haren ja van dat taiken van Jezus heurd. ¹⁹ "Zigst nou wel," zeden Farizeeërs den ook tegen nkander, "ales gaait gloeiend mis! Kiek mor, haile wereld lopt achter hom aan!"

²⁰ Onder mensen dij noar t feest gingen om God te aanbeden, wazzen ook n stok of wat Grieken. ²¹ Zai gingen noar Filippus dij oet Betsaïda in Galilea weg kwam. Ze zeden: "Meneer, wie zollen Jezus geern even hebben willen." ²² Filippus gaait t votdoalek aan Andreas vertellen, en mit zien baaident goan ze t tegen Jezus zeggen.
²³ Jezus zegt tegen heur: "t Is nou zo wied dat Menskenzeun eerd wordt. ²⁴ k Geef joe verzekern: as n waaitkorrel nait in grond vaalt, en doar nait dood gaait, blift e mor allenneg. Mor as e aal dood gaait, geft e n bult zoad. ²⁵ Wèl te veul aan t levent vaast holdt, dij zel t kwiet worden. Mor wèl in dizze wereld niks om zien levent geft, zel t holden. En zo zel e alderdeegs t aiweg leven holden. ²⁶ As der ain is dij mie dainen wil, mout e zok bie mie aansloeten; en doar ik bin, zel hai ook wezen dij mie helpt. En as ain mie helpt, dij zel ale eer kriegen van mien voader!
²⁷ Mor: k wait nait meer hou of k t heb. Wat zel k ter aiglieks nog van zeggen? Voader, bespoar mie asjeblieft wat mie te wachten staait? Mor doar bin k ja veur kommen: dit mout k deurmoaken. ²⁸ Voader, loat zain wèl of ie wel nait binnen!"
Dou klonk ter n stem te hemel oet: "k Heb ja al zain loaten wèl of k bin. Mor k zel t nóg n moal zain loaten." ²⁹ Lu dij der omtou stonden en dij t apmoal heurd haren, zeden: "Dat was n dunderslag!" Aander lu zeden: "n Engel het wat tegen hom zegd!" ³⁰ Mor Jezus zee: "Dij stem was der nait veur mie, mor veur joe. ³¹ Der vaalt nou n beslizzen in dizze wereld; dij t in dizze wereld veur t zeggen het, wordt ter oetsmeten! ³² As k in lucht stoken bin, hier bie mensen vot, zel ik ze apmoal bie mie hoalen!" ³³ Doar wol e mit zeggen hou of e staarven zol. ³⁴ Mensen zeden den ook: "Mor wie hebben oet ons aigen wet vernomen dat Messias veur altied aan macht blieven zel. Hou kin ie den beweren dat Menskenzeun in lucht stoken wordt? Dij Menskenzeun, wat is dat den veur ain?" ³⁵ Jezus zee: "t Licht is nou nog bie joe, mor dat duurt nait zo laank meer. Blief onderwegens, zolaank as t nog licht is. Aans zel duustern joe nog overvalen. Want wèl in t duustern lopt, wait nait woar of e hèn gaait. ³⁶ Zolaank as ie t licht bie joe hebben, mout ie doar op vertraauwen; den zel ie der ook bie heuren." Dou e dat zegd haar, ging e vot en kroop veur heur bezied.
³⁷ Ze haren bie ale taikens west dij e zain loaten haar en toch leufden ze nog altied nait in hom. ³⁸ Zo kwam oet wat of profeet Jesaja al zegd haar:
'Heer, wèl leufde aiglieks wat wie verteld hebben?
En hai het nog wel aan elkenain zain loaten
hou machteg of e wel nait was!'
³⁹ Ze konden t nait leuven, omreden Jesaja haar ja ook zegd:
⁴⁰ 'Hai het heur ogen blind moakt,
en heur haart swil bezörgd.
Aans zollen ze wel beter keken hebben,
en wel meer inzicht kregen hebben.
Den zollen ze veurvaast in de goaten kregen hebben
wat of ze verkeerd doan haren
en den zol k ze nou van heur blindhaid ofhelpen kinnen.'
⁴¹ Jesaja zee dit omreden hai haar zain wèl of Jezus was; aiglieks haar e t ja over hom. ⁴² Tóch wazzen der onder laaiders van t volk ook n bult dij zien kaant kozen. Mor om Farizeeërs duurden zai der nait veur oetkommen, omreden ze werden den te sinegoge oetsmeten. ⁴³ Want ze wazzen laiver in aanzain bie mensen as bie God.
⁴⁴ Dou zee Jezus mit klem: "Wèl feduutsie in mie het, vertraauwt nait bloots op mie. Aiglieks geft e zien vertraauw aan hom dij mie stuurd het. ⁴⁵ Kiek goud noar mie, den zai je hom dij mie stuurd het. ⁴⁶ Ik bin as n licht in wereld kommen. Elk dij aan mie zien vertraauw geft, blift nait in t duustern zitten. ⁴⁷ As ain heurt wat of ik te vertellen heb, mor hai holdt zok ter nait aan, bin ik t nait dij over hom oordailt. k Bin ja kommen om mensen te redden, en nait om over heur te oordailen. ⁴⁸ Wèl niks van mie waiten wil en nait aannemt wat of ik te zeggen heb, het al n rechter: aal wat k zegd heb, dát zel op leste dag over hom oordailen. ⁴⁹ Ik heb ja nait oet miezulm proat. Mien voader, dij het mie stuurd en dij het mie besteld wat of k tegen joe zeggen mos. ⁵⁰ En bosschop dij k van hom breng, geft zekerhaid - dat wait ik veurvaast - over leven veur aiweg en altied. Aal wat ik zeg, zeg k krekt zo as mien voader mie t besteld het."