Johannes 11

¹ Der was ain zaik; t was Loazerus oet Betanie, dörp van Maria en heur zuster Marta. ² Maria haar doudestieds Jezus baalzemd mit mirre en zien vouten mit heur hoar ofwist; Loazerus, dij zaik was, was heur bruier. ³ Zien zusters stuurden ain om Jezus mit bosschop: "Meneer, heur ie toch ais, joen goie vrund is zaik." ⁴ Dou Jezus dat heurd haar, zee e: "Dit is gain kwoal doar e dood aan gaait, mor hierdeur zel ie ais zain hou geweldeg God is en zien zeun krekt zo!" ⁵ Jezus hong slim aan Marta, aan heur zuster en aan Loazerus. ⁶ Dou e heurd haar, dat Loazerus zaik was, bleef e toch nog twij doagen doar of e was. ⁷ Dén eerst zegt e inainen tegen zien leerlingen: "Loat wie weerom goan noar Judea." ⁸ "Mor rabbi," zeggen zien leerlingen tegen hom, "körtsleden nog perbaaierden Jeudse laaiders aalvot joe mit stainen dood te gooien, en nou wol ie der al weer hèn?" ⁹ "t Is doags toch twaalf uur licht," zee Jezus. "Ain dij op kloarlichten dag op pad is, lopt naargens tegenaan, omreden hai kin bie daglicht goud zain. ¹⁰ Mor in duustern kin e aal overaal tegenaan lopen. t Is den ja nait licht!" ¹¹ Den gaait e wieder: "Loazerus, ons vrund, is insloapen, mor k goa hom weer wakker moaken." ¹² "Mor meneer," zeden zien leerlingen tegen hom, "as e slept, zel e toch juust beter worden." ¹³ Jezus mainde vanzulm, dat hai oet tied kommen was, mor zai dochten, dat e t over sloapen haar. ¹⁴ Dou zee Jezus liekoet: "Loazerus is dood! ¹⁵ Om joe bin k blied dat k ter nait bie was; nou kin je feduutsie in mie kriegen. Loat wie mor noar hom tougoan." ¹⁶ "Loat wie den ook mor mitgoan," zee Tomas, 'Twijling', tegen zien pazzipanten, "en staarven mit hom."
¹⁷ Dou Jezus doar aankwam, vernam e, dat Loazerus al vaaier doagen in t graf lag. ¹⁸ Betanie ligt stoef bie Jeruzelem, nog èns gain vieftien stoadies der vanòf. ¹⁹ Der wazzen den ook nog al wat Jeuden noar Marta en Maria kommen om heur te troosten mit t verlais van heur bruier. ²⁰ Dou Marta vernam, dat Jezus der aan kwam, laip zai hom in muit; Maria bleef in hoes. ²¹ "Meneer," zee Marta tegen Jezus, "haar ie hier west, den zol mien bruier nou nait oet tied wezen. ²² Mor ook nou wait k ja, dat God joe ales geven zel woar ie hom om vroagen zellen." ²³ "Joen bruier zel veurvaast weer opstoan," zegt Jezus tegen heur. ²⁴ "Dat wait k ja wel," zegt Marta, "hai zel weer opstoan bie opstanden op leste dag." ²⁵ Jezus zee: "Opstanden en leven, dat bin ík. Wèl feduutsie in mie het, zel weer tot leven kommen, ook al is e dood. ²⁶ En elk dij nou leeft en vertraauw in mie het, zel veurvaast nooit meer oet tied kommen. Dat waist toch zeker wel?" ²⁷ "Joa meneer," zegt ze, "ik wait zeker dat ie Messias binnen, God zien zeun, dij noar ons apmoal toukommen zol."
²⁸ Dou e dit zegd haar, ging ze heur zuster Maria roupen. Flusternd zee ze: "Meneer is ter! Hai vragt noar die." ²⁹ Dou Maria dat heurde, kwam ze op slag in t èn en ging noar hom tou. ³⁰ Jezus was dou nog nait in t dörp, mor op t stee doar Marta hom trovven haar. ³¹ Jeuden dij bie heur in hoes wazzen om heur te troosten, zaggen heur hoasteg in t èn kommen en noar boeten goan. Ze gingen heur achternoa omreden ze dochten dat ze noar t graf ging om te schraiven.
³² Maria kwam op t stee doar Jezus was. Dou ze hom zag, vuil ze veur hom op knijen en ze zee: "Haar ie hier west, den zol mien bruier nait sturven wezen." ³³ Jezus zag heur schraiven en Jeuden ook dij heur noakommen wazzen. Hai wer inwendeg kwoad en roakte haildaal van slag. ³⁴ Hai vruig: "Woar heb ie hom hènlegd?" "Hierzo! Kiek mor ," zeggen ze. ³⁵ Dou begunde Jezus te reren. ³⁶ "Kiek es hou e aan hom hong!" zeden Jeuden onder nkander. ³⁷ Gounent zeden: "Hai het ogen van dij blinde toch ook beter moakt? Haar e t den nait zo regeln kind, dat Loazerus nait oet tied kwam?"
³⁸ t Gemoud schut Jezus weer vol. Hai gaait noar t graf tou, n grot mit n stain der veur. ³⁹ "Dou dij stain ais vot," zee e. "Mor meneer," zegt Marta, zuster van dij sturven was, "t zel nait vris roeken. Hai is ja al drij doagen dood!" ⁴⁰ Mor Jezus zegt tegen heur: "k Heb die ja al zegd, wat God wel nait kloar krigt, ast mor vertraauw in hom hest." ⁴¹ Dou deden ze toch stain mor vot. Jezus keek noar hemel en zee: "Voader, bedankt, dat ie noar mie lusterd hebben. ⁴² Zulm wis ik ja wel dat ie aaltied noar mie lustern, mor k zee dit om aal t volk dat om mie tou staait; dij lu zellen nou toch wel overtuugd roaken, dat ie t binnen dij mie stuurd het."
⁴³ Dou e dit zegd haar raip e haard: "Loazerus, kom ais noar boeten tou!" ⁴⁴ En hai kwam noar boeten mit winsels om handen en vouten en n swaitdouk om kop tou. "Moak hom mor lös," zegt Jezus, "den kin e zien gaang goan."
⁴⁵ Hail wat Jeuden dij bie Maria west haren, keken vol bewondern noar wat Jezus kloar kregen haar en kregen feduutsie in hom. ⁴⁶ Mor gounent gingen noar Farizeeërs en zeden wat Jezus doan haar. ⁴⁷ Dou raipen Jeudse laaiders en Farizeeërs Hoge Road bie nkander. "Wat dou we," zeden ze. "Dij man loat n bult taikens zain. ⁴⁸ As wie hom geworden loaten, zel elk mit hom votlopen en zellen Romaainen niks van tempel en van ons volk hail loaten." ⁴⁹ Ain van heur, Kajafas, dij hogepriester van t joar was, zee: "Ie begriepen hail nait woar of t om gaait. ⁵⁰ Snap ie den nait, dat ie der ales bie winnen as der ain dood gaait veur t haile volk en nait hail ons volk ombrocht wordt!" ⁵¹ Dat zee e nait oet zokzulm; hai was ja hogepriester van t joar en doarom kon e nou al zeggen dat Jezus staarven zol veur t volk. ⁵² En nait bloots veur heur, mor ook om aal God zien kinder bie nkander te brengen, dij nou over haile wereld oet nkander jagd binnen. ⁵³ Van dij dag òf wazzen ze vaast van plan, ze zollen Jezus van kaant moaken. ⁵⁴ Doarom wol Jezus nait meer zo vrij onder Jeuden touholden, mor ging e doar vot, noar Efraïm, n stad stoef aan woestijn; doar bleef e mit zien leerlingen.
⁵⁵ t Zol gaauwachteg Jeuds Pascha wezen en oet t haile laand ging n bult volk al veur t feest noar Jeruzelem veur rituele raineging. ⁵⁶ Lu keken noar Jezus oet. Dou ze nkander in tempel trovven, zeden ze: "Hai komt veurvaast nait noar t feest, denk ie ook nait?" ⁵⁷ Jeudse laaiders en Farizeeërs haren ja opdracht geven aan te droagen woar of Jezus touhuil; den konden ze hom griepen.