Jakobus 5

Geduld

⁷ Hebt doarom geduld, bruiers en zusters, net zo laank dat de Heer weerom komt. Boer zit ook ja te wachten op goie vruchten van zien laand, en het zo laank geduld dat e haarfst- en veurjoarsregen had het. ⁸ Weest ie den ook geduldeg: spreekt joezulm mor moud in! De Heer komt ja zo!
⁹ Ie mouten nait tegen nkander kloagen, bruiers en zusters, as ie nait zulm veroordaild worden willen. Richter staait ja al veur deur.
¹⁰ Bruiers en zusters, neemt, as t op verdroagen van kwoad of op geduld aankomt, n veurbeeld aan perfeten dij in de Heer zien noam sproken hebben. ¹¹ Wie priezen heur ja gelukkeg, dij volholden hebben. Ie hebben wel heurd van Job zien standvasteghaid. En ie hebben zain hou of de Heer t in t lest mit hom moakt het. De Heer het ja haart veur ons en ontfaarmt zok over ons.
¹² Mor benoam, mien bruiers en zusters, sweert nait. Nait bie hemel en nait bie eerde of bie wat ook mor. Loat joen joa "joa" wezen, en joen nee "nee". Aans vaal ie onder t oordail.