Jakobus 4

Vrundschop mit wereld

¹ Woar komt dat gekekel en dij roezie bie joe heer? Toch enkeld deur joen driften, dij joe nait mit vree loaten? ² Ie willen wat hebben, en ie hebben t nait. Ie binnen ofgunsteg ² en willen veur nkander nait onderdoun, mor ie kinnen t nait kriegen. Nou, den moak ie roezie en gaait t op n vechten. Dat ie t nait hebben, komt doar vandoan dat ie der nait om vroagen. ³ Nou ja, vroagen doun ie nog aal! Mor toch krieg ie t nait, omreden ie vroagen der om mit n verkeerde bedoulen. Noamelk om t ter in joen driften deur te joagen. ⁴ Traauwbrekers! Wait ie nait, dat vrundschop mit wereld vijandschop mit God betaikent? Wèl of n vrund van wereld wezen wil, wordt alderdeegs n vijand van God. ⁵ Of docht ie, dat t gain mainens is as Schrift zegt: 'Gaist, dij Hai in ons wonen let, aaist Hai haildaal veur zokzulm op'? ³ ⁶ Mor (as wie Hom dij geven) is E ons zoveulstemeer ter wille. Der staait ja: 'God keert zok tegen hoogmoudegen, mor nedergen is E ter wille'. ⁴ ⁷ Boegt joe doarom veur God. Verzet joe tegen duvel. Den gaait dij veur joe op loop. ⁸ Komt noar God tou. Den komt Hai noar joe tou. Moakt joen handen schoon, zundoars! Moakt joen haarten zuver, ie innerliek verdailde lu! ⁹ Tilt ter mor swoar aan. Treurt en reert. Joen laggen mout omsloagen in treuren, joen bliedschop in mismoudeghaid. ¹⁰ Moakt joe klaain veur de Heer. Den moakt Hai joe groot.