Jakobus 3

Tong in toom holden

¹ Bruiers en zusters, loaten der toch nait zo veul van joe zok as leroars aanstellen. Ie waiten toch, dat wie der strenger om oordaild worden zellen. ² Wie dounen ja aalmoal hail wat mizze stappen. Wèl of in zien proat gain mizze stap dut, doar is niks op aan te maarken en dij kin ook zien haile liggoam beheersen. ³ As wie peerden toom in bek doun, dat ze noar ons lustern zellen, den kin we t haile daaier sturen. ⁴ Denk ook ais om schepen: zo groot as ze binnen, en hou stief störm ze ook veuroet jagt, ze worden mit n hail lutje rouer doarhèn stuurd, doar of stuurman ze hebben wil.
⁵ Zo is ook tong mor n klaain lid, en het toch n dikke proat. Kiek mor ais, hou of n luk vuurke n hail bos in braand zet. ⁶ Zo n vuur is tong ook. Maank ons leden is t tong, doar onrecht t mit wint. Hai moakt n aander swaart van kop tou toon en benemt hom deur zienm steukeln ale kaanzen, aanstoken as e zulm is deur t vuur oet hel. ⁷ Ale soorten wilde baisten, vogels, kroepende en swemmende daaier worden ja deur t mensdom bedwongen en binnen in zien macht. ⁸ Mor tong het gain mensk in zien macht. Hai is n onberekenboar kwoad, vol dodelk venien. ⁹ Doar pries wie ons Heer en Voader mit. En doar verfluik wie mensken mit dij noar God zien beeld schoapen binnen. ¹⁰ Zegen en fluiken kommen oet ain en dezulmde mond. Dat mout aans, bruiers en zusters.
¹¹ Kin der tou zulmde wèl oet zuit en brak wotter opborreln? ¹² Kin ie van n viegeboom olieven winnen, of van n wiendroef viegen, bruiers en zusters? Ja net zo min kin n zolde wèl zuit wotter geven.