Jakobus 2

Leuven en doun

¹⁴ Wat heb ie der aan, mien bruiers en zusters, as ain zegt, dat e geleuf het, mor der nait noar dut? Kin zo n geleuf hom den redden?
¹⁵ Stel, der is n bruier of n zuster dij verlet het om klaaier en doagelks brood. ¹⁶ En ain van joe zol zeggen: "t Beste der mit! Zörgt mor, dat ie waarm blieven, en eet joe mor zat", mor ie zollen ze nait heur gerak geven, wat hebben ze doar aan?
¹⁷ Zo is t ook mit t geleuf. As ter nait noar doan wordt, is t op zokzulm dood.
¹⁸ Mor as ain nou es tegen joe zegt: "Ie hebben geleuf, ik heb doaden." Bewies mie den mor ais dat ie geleuf hebben, as ie gain doaden zain loaten kinnen! Den zel ik joe oet mien doaden mien geleuf zain loaten.
¹⁹ Leuf ie, dat ter ain God is? Doar doun ie goud aan. Mor kwoaie gaisten leuven dat ook. En doarom trillen ze van benaauwdeghaid. ²⁰ Domkop! Wil ie t bewies, dat t geleuf zunder doaden gain sìnt weerd is? ²¹ Is ons voader Oabram nait om zien doaden rechtveerdeg verkloard, dou e zien zeun Izak op t altoar legde? ²² Zain ie nou wel, dat zien geleuf liekop ging mit zien doaden? Deur zien doaden wer zien geleuf eerst wat of t wezen mos. ²³ Zo wer t schriftwoord bevestegd: 'Oabram leufde in God en t wer hom as gerechteghaid aanrekend'. ¹ Hai wer God zien vrund nuimd. ²⁴ Zain ie nou wel, dat n mensk oet doaden rechtveerdeg verkloard wordt en nait enkeld deur geleuf?
²⁵ Mit houer Rachab was t nait aans. Ook zai wer rechtveerdeg om heur doaden: ze luit verkenners bie heur in hoes en hulp ze ontkommen bie n aander pad laans. ²⁶ Net zo as t liggoam zunder oam dood is, zo is ook t geleuf zunder doaden ja dood.