Jakobus 2

Gain onderschaaid

¹ Mien bruiers en zusters! Ie leuven in ons Heer Jezus Christus, dij in heerlekhaid opnomen is. Den mout ie bie mensken gain onderschaaid moaken. ² Stelt joe ais veur: in joen soamenkomst komt n man mit n golden ring om vinger en in mooie klaaieroazie. En der kwam ook n aarme man, dij mor zuneg schier was. ³ En ie zollen opkieken tegen man in mooie klaaier en tegen hom zeggen: "Neemt dit stee mor. Doar zit ie goud!" Mor tegen aarme zol ie zeggen: "Goa doar gunnent mor stoan!", of: "Goa mor bie mien vouten op deel zitten!" ⁴ Zol ie den nait mit joezulm in twijspaalk kommen? Goan ie den nait te waark as richters, dij op verkeerde gronden oordailen?
⁵ Heur es, mien laive bruiers en zusters! Het God nait dijent dij wie hier aarm reken, oetkozen om riek in t geleuf te worden, en aarfgenoamen van t keunenkriek, dat Hai touzegd het aan heur dij Hom laif hebben? ⁶ Mor ie hebben aarme min behandeld! Binnen t rieke lu nou net nait, dij joe der onder holden en joe veur rechtbaank slepen? ⁷ Is t nait zo, dat zai t juust binnen, dij goie noam lastern dij over joe aanroupen is?
⁸ As ie keunenkleke wet holden noar t schriftwoord: 'Ie zellen joen noaste laifhebben as joezulm', den doun ie t goud. ⁹ Mor as ie onderschaaid moaken, den zundeg ie. Wet veroordailt joe den as overtreders.
¹⁰ Wèl of haile wet ja holdt, mor over ain punt strovvelt, het zundegd tegen ale geboden. ¹¹ Hai, dij zegd het: "Ie mouten nait klongeln!", het ook zegd: "Magst gainent ombrengen". As ie nait klongeln, mor wel ain ombrengen, heb ie toch haile wet overtreden. ¹² Proat en dout as lu, dij deur wet dij vrijhaid geft, oordaild worden zellen. ¹³ Onbaarmhaarteg zel t oordail wezen over hom, dij zulm nait baarmhaarteg west het. Dij baarmhaarteg west het, zegt van t oordail: "Dat dut mier niks!"