Jakobus 1

Heuren of doun

¹⁹ Denkt ter om, mien laive bruiers en zusters, elkenain mout gaauw wezen om te lustern, mor nait te gaauw mit mond. En nait votdoalek kwoad worden. ²⁰ As ain kwoad wordt, dut e ja nait wat of God wil.
²¹ Doarom, vot mit ale voeleghaid en mit wat of ter nog van t kwoad zitten bleven is. Neemt zaachtmoudeg t Woord in joe op, dat in joe oetzet is. Dat kin joe t levent redden.
²² Dout wat of t Woord zegt, en zit ter nait allain noar te lustern. Aans hol ie joezulm veur de gek. ²³ Wèl of t Woord heurt en zok ter nait noar het, liekt op ain dij zien gezicht zo as e dat mitkregen het, in spaigel zigt. ²⁴ Nait meer as dat e zokzulm in t oog kregen het, is e al weer vot. Op slag verget e hou of e der oet zag. ²⁵ Mor wèl of zok bogt over volmoakte wet dij vrijhaid geft, dij nait verget wat of e heurt en der ook noar dut, dij zel doar gelukkeg bie worden.
²⁶ As ain maint, hai is godsdainsteg, mor het zien tong nait in toom en moakt zokzulm wat wies, dij zien godsdainsteghaid het niks om hakken. ²⁷ Veur ons God en Voader is godsdainst zunder lek of brek: omkieken noar weeskinder en wedevraauwen in heur ellèn.
En zok nait aansteken loaten deur wereld.