Hebreeërs 8

Eredainst van t Eerste Verbond

¹ Punt doar t om draait is dit: Wie hebben ain as hogepriester, dij zitten goan is aan rechterzied van Majesteit zien troon in hemel. ² Hai dut doar dainst in t ainegste echte haailegdom, in tìnt, dij nait deur mensken opzet is, mor deur de Heer.
³ Elke hogepriester het opdracht, goaven en ovvers te brengen. Doarom mos dizze ook wat in handen hebben om op te droagen. ⁴ As E noú op eerde was, zol E èns gain hogepriester wezen. Der binnen ja al gounent dij goaven brengen zo as wet dat veurschrift. ⁵ Mor heur dainst is allain mor n ofbeelden en n glimp van dij in hemel. Dou Mozes tìnt opzetten wol, kreeg e den ook van God te heuren: "Zörg der veur dat ie alles moaken noar t veurbeeld dat joe op baarg zain loaten is." ²³ ⁶ Mor t waark as priester dat Jezus touwezen is, is veul en veul meer. Zo is t verbond, doar Hai in middeld het, ook veul beder: t berust ja op bedere beloftes.
⁷ As ja op dat eerste verbond niks aan te maarken was, haar der gain twijde neudeg west. ⁸ Mor God geft heur n inzeggen:
"Der kommen tieden, zegt de Heer,
dat Ik mit t volk van Izrel
en mit t volk van Judoa,
n nij verbond sluten zel.
⁹ Dat zel aans wezen as t verbond
dat Ik sloten heb mit heur veurolden,
dou Ik heur bie haand kreeg
en oet Egypte laaidde.
Zai hebben zok ja nait holden
aan mien verbond,
en Ik heb handen van heur oftrokken,
zegt de Heer.
¹⁰ Dit is t verbond dat Ik loater
mit t volk van Izrel sluten zel, zegt de Heer.
Mien wetten breng Ik heur onder t verstand,
in heur haart zel Ik ze schrieven.
Ik zel heur God wezen en zai mien volk.
¹¹ Der zel gainain zien landsman of zien bruier meer onderwiezen
en tegen hom zeggen: 'Hol de Heer in reken.'
Ze zellen Mie ja altmoal kennen - lutjekes en groten.
¹² Ongerechtegheden zel Ik heur genoadeg wezen
en aan heur zunden zel Ik nait langer denken." ²⁴
¹³ Deurdat Hai t hier over n nij verbond het, het t eerste veur Hom ofdoan. En alles wat old is en zokzulm overleefd het, staait op punt van verswinden.

9

¹ Ook t eerste verbond haar liturgische veurschriften en haar n haailegdom hier op wereld. ² Der was n tìnt opzet. t Veurste gedailte doar zeden ze tegen: "t Haailege." Doar stonden kandeloar en toavel mit ovverbroden. ³ Achter t twijde gerdien kwam t gedailte doar ze "t Allerhaailegste" tegen zeden. ⁴ Doar heurden bie: t golden altoar veur wierookovvers en verbondskist, haildaal mit gold besloagen, en golden voas mit manna ston der in, mit Aäron zien staf, dij bluid haar, en de stainen ploaten mit tekst van t verbond. ⁵ Boven op kist stonden cherubs in aal heur pronk en pracht. Ze spraaidden heur vleugels boven t stee doar om genoade vroagd wordt. Op onderdailen kin we nou nait wieder ingoan.
⁶ Zo was alles doar inricht. Priesters kommen geregeld in t eerste gedailte van tìnt om heur liturgische dainsten te verrichten. ⁷ Allenneg hogepriester komt ainmoal sjoars in t achterste gedailte en den het e bloud bie zok, dat hai ovvert: veur zokzulm en veur noaloategheden van t volk, dij ze doan hebben zunder dat ze t deur haren. ⁸ Doar moakt Hillege Gaist dudelk mit, dat tougang tou t echte haailegdom nog nait vrij is, zo laank as tìnt van t eerste verbond nog dainst dut. ⁹ Dit is n peroabel, dij we op ons tegenswoordege tied toupazen kinnen. Der worden doar goaven en ovvers brocht, mor dij geven mensken dij God dainen doun, nog gain vrij gewaiten. ¹⁰ Ik heb t over etendrinken en allerhande liturgische wasbeurten en deur mensken opbedochte veurschriften. Dij gelden ja bloots mor tot ter wat beders veur in stee komt. ¹¹ Mor nou is Christus kommen as hogepriester van ale kommende goie dingen. Tìnt doar Hai in daint, is beder en volmoakter. Dij is nait deur mensken moakt. Dat is te zeggen: dij heurt nait bie dizze wereld.¹² Veur ainmoal en aaltied is Hai tou t haailegdom ingoan. En dat nait mit bloud van bokken en kaalver, mor mit zien aigen bloud het E n verlözzen bewaarkt veur aiweg en aaid. ¹³ As ja t bloud van bokken en bollen en t streuen van aask van n veers, onnure mensken aan boetenkaant al zo zuver moaken kin, ¹⁴ houveulstemeer kin Christus zien bloud dat den! Deur aiwege Gaist het Hai zokzulm as n zuver ovver aan God brocht. Dat ovver zuvert ons gewaiten van n menaaier van leven, dij op dood oetlopt. Zo kin we God, dij leeft, dainen.
¹⁵ Deurdat Hai der in bemiddeld het, is ter n nij verbond kommen. Zai dij roupen worden tou t aiwege aarfdail, kriegen nou écht wat heur touzegd is. Zien dood het mensken ja vrijmoakt van zunden dij onder t eerste verbond bedreven wazzen.
¹⁶ Wil der sproake wezen van n testement, den kin t nait aans of der mout vaaststeld worden, dat aarfloater dood is. ¹⁷ n Testement wordt ja bloots geldeg as ain ter tou doan het. Zo laank as e nog leeft, het t testement nog gain oetwaarken. ¹⁸ Doarom is t eerste verbond den ook nait inwaaid zunder bloud. ¹⁹ Eerst legde Mozes ale geboden van wet aan t volk veur. Dou nam e t bloud van kaalver en bokken, dee der wotter bie en besprenkelde mit n kwast van sangen wol en hysop, t bouk zulm en t haile volk. ²⁰ Hai zee derbie: "Dit is t bloud, doar t verbond mit bekrachtegd wordt, dat God mit joe sloten het." ²⁵ ²¹ Tìnt en ale riw veur liturgie besprenkelde hai ook mit bloud. ²² Volgens wet wordt sikkom alles mit bloud zuverd. Der is gain vergeven of der mout eerst bloud vergoten worden.
²³ t Kin nait aans of deur zukse middels mozzen ofbeeldens van hemelse dingen zuverd worden. Mor hemelse dingen zulm, vroagen veul bedere ovvers. ²⁴ Christus is ja tou gain haailegdom ingoan dat deur mensken moakt is en dat aans nait is as n ofbeelden van t echte haailegdom. Nee, Hai is hemel zulm ingoan en is veur God verschenen, veur ons bèst. ²⁵ Doar huift E zok ook nait aaldeur weer te ovvern, zo as hogepriester joar in joar oet in t haailegdom gaait mit bloud dat zienent nait is. ²⁶ Aans haar Hai ieder bòt vannijs lieden mouten van t begun van wereld òf. Mor nou is E ainmoal, aan t ènd van tied, veurndag kommen om deur zien lieden zunden tou wereld oet te helpen. ²⁷ t Heurt nou ainmoal bie t menskenlevent: ze mouten ainmoal staarven en den komt t oordail. ²⁸ Zo is t ook mit Christus goan: ainmoal het E t ovver van zien levent brocht en zunden van altmoal op zok nomen. As Hai twijde moal verschient, zel dat wezen nait vanwegens de zunden. Nee, den brengt E t haail aan elkenain dij noar Hom oetkikt.