Hebreeërs 7

Priester Melchisédek

¹ Melchisédek, doar t hier over gaait, was keunenk van Salem en priester van God, de alderhoogste. Dou Oabraham keunenks versloagen haar, kwam Melchisédek hom in muit en zegende hom. ² Oabraham gaf hom dou t tiende paart van alles wat of e op keunenks veroverd haar. ²⁰ Noam "Melchisédek" betaikent eerstens "Keunenk van Gerechteghaid". Twijdens is hai ook nog keunenk van Salem en dat bedudt "Keunenk van Vree". ³ Zien pa, zien moeke, zien stamboom - ze binnen altmoal nait bekend, en wie waiten niks van t begun of t èn van zien levent. Hai liekt net op God zien Zeun: veur aaltied is e priester.
⁴ Mout je ais noagoan hou zo'n groot man of dat was: Oartsvoader Oabraham gaf hom tiende paart van alles wat of e veroverd haar. ⁵ Nou mouten Levi zien noazoaten dij priester binnen, bie wet om tiende paart vroagen aan t volk. Dat is te zeggen: van heur aigen volksgenoten, ook al stammen dij, net zo as zai, van Oabraham òf. ⁶ Mor hier is ain, Melchisédek, dij haildaal nait tou heur volk heurt, en dij het t tiende paart nomen van Oabraham zulm en het man zegend, dij droager was van wat God touzegd haar. ⁷ Nou kin gainain ontstrieden: wèl zegent, is hoger as wèl zegend wordt. ⁸ Doar komt nog bie: in t aine gevaal gaait t om staarvelke mensken dij t tiende paart kriegen, en in t aander gevaal om ain, doar of Schrift van zegt, dat E leeft. ⁹ Wie kinnen alderdeegs zeggen dat Levi, dij t recht haar om tiende paart òf te nemen, zulm al tiende paart geven het (noamelk aan Melchisédek), deur Oabraham. ¹⁰ Levi was ter nog wel nait, mor hai was ter toch al in persoon van zien veurvoader Oabraham bie, dou Melchisédek hom in muit kwam.
¹¹ t Volk het wet kregen mit t oog op volmoakthaid. Mor as Levieten heur priesterschop volmoakt west haar, woarom mos ter den nog n aander priester aansteld worden - n priester net as Melchisédek en nait zo ain as Aäron? ¹² As t priesterschop veraandert, mout wet dat ook. ¹³ Man doar t hier over gaait, heurde bie n aander stam doar gainain van t altoar bedaind haar. ¹⁴ Elkenain wait ja, dat ons Heer oet stam Judoa komt, en wat dat aangaait: Mozes het toch gain woord zegd over priesters oet dij stam.
¹⁵ En t wordt nog n bult dudelker as we noagoan dat ter n aander priester inzet wer. Dij is, net as Melchisédek, ¹⁶ gain priester worden deur wet en ofstammen. Hai is dat worden op grond van n duurzoam levent. ¹⁷ Van Hom wordt ja zegd: "Ie binnen priester veur aiweg en aaid, net as Melchisédek." ²¹ ¹⁸ t Olde veurschrift wordt aan zied schoven as e naargens meer tou dainen kin. ¹⁹ Wet het ja gain volmoakthaid brocht - mor nou stel we ons hoop op wat beders. En dij hoop brengt ons dichter bie God.
²⁰ En der kwam nog ais n dikke aid bie. Dij aandern werden priester zunder dat ter n aid bie te pas kwam. ²¹ Mor dou hái priester wer, legde God aid òf. De Heer het sworen, en het zel Hom nait muiten: "Ie binnen priester veur aiweg en aaid." ²² ²² En zo staait Jezus börg veur n verbond dat veul beder is.
²³ Der is nóg n verschil: van dij aander priesters binnen der n haile bult. Dat komt, omdat dij staarven mouten en nait "veur aiweg priester" wezen kinnen. ²⁴ Mor deurdat Hai aaltied leven blift, gaait zien priesterschop op gainain aander over. ²⁵ Doarom kin Hai mensken, dij deur Hom noar God tou goan, ook veur aaid redden. Hai leeft ja aaltied om veur heur n goud woord te doun.
²⁶ Zo'n hogepriester, doar haar we nou net verlet om: haaileg, zunder lek of brek, ain dij niks mit zundoars te doun het, hoog boven alles verheven. ²⁷ Dij aander hogepriesters mozzen elke dag eerst ovvers brengen veur heur aigen zunden en den veur t volk heurent. Dat huift Hái nait: Hai het dat veur ainmoal en aaltied doan, dou E zokzulm ovverde. ²⁸ Wet moakt ja lu tou hogepriester dij ook mor mensken binnen: mor aid, dij noa t in kracht treden van wet oetsproken is, dij stelt de Zeun aan: volmoakt is E - veur aiweg en aaid.