Hebreeërs 5

Nait weerom noar zunde

¹¹ Der is nog veul meer over te zeggen, mor t is stoer om t oet te stokken: t duurt ja zo laank veurdat ie t onder pet hebben! ¹² Ie haren, noar tied rekend, ja al laank zulm leermeesters wezen mouten. Mor ie hebben der meer verlet om dat men joe t ABC van God zien bosschop biebrengt. t Is zo wied kommen, dat ie mouten weer aan vlès. Stevege kost kin ie ja nait verdroagen! ¹³ Elk dij nog aan vlès is, het gain wait van goud of kwoad: dij is nog mor n lutje potje. ¹⁴ Mor grode mensken kriegen stevege kost. Dij hebben heur vermogens bruken leerd om onderschaaid te moaken tussen goud en kwoad.

6

¹ Loat we doarom t begun van Christus zien leer loaten veur wat of t is, en t gaauw hebben over t ènd en t doul der van. Wie willen nait vannijs grondloag leggen: t joe ofkeren van n menaaier van leven dij oetlopt op dood, en van geleuf in God. ² Net as van t onderricht over deup, van t opleggen van handen, opstanden van doden en t aiweg oordail. ³ En dat zel we doun, as God t toustaait teminnent.
⁴ -⁶ Want as mensken ainmoal t licht zain hebben en toch weer ofvalen binnen, den bestaait t nait, dat ze vannijs tou bekeren brocht worden. Ook al hebben ze van hemelse goaven pruifd en dail kregen aan Hillege Gaist en aan God zien goie woord en kracht van aankommende wereld. Zai sloagen ja God zien Zeun zo t rekent nog n moal aan t kruus en zetten Hom veur gek.
⁷ t Is net zo as mit n lap laand: dat zogt regen op dat ter ieder moal op vaalt. En dat brengt boeren, dij t laand beaarbaiden, goie vrucht op. Op zo'n lap ligt God zien zegen. ⁸ Mor laand, dat doorns en stiekels oplevert, het gainain wat in reken. Den is t net of ter n fluik op ligt en op t lest gaait braand ter in.