Hebreeërs 4

Jezus as hogepriester

¹⁴ Loat ons vaastholden aan dizze beliedenis: wie hebben n beste hogepriester dij hemel ingoan is. Dat is Jezus, God zien Zeun. ¹⁵ Wie hebben ja gain hogepriester, dij mit ons swakheden gain omdenken hebben kin, nee hur! Wie hebben ain, dij krekt as wie, op dezulmde menaaier van ale kaanten oetperbaaierd is. Mor zunde doan het E nait. Dat mos ter nog bie kommen! ¹⁶ Zodounde kin we vol vertraauw op troon van genoadege God tou goan, omdenken en genoade in muit. Den wor we holpen, as we t neudeg hebben.

5

¹ Elke hogepriester wordt ja oet t volk kozen om bie God veur aander mensken op te treden, en om goaven en ovvers veur heur zunden te brengen. ² Hai kin ook begrip opbrengen veur lu dij nait beder waiten en in verbiestern binnen. Hai het ja zulm ook swak west! ³ Doarom mout e den ook ovvers, dij e veur zunden van zien volk opdragt, geliekegoud veur zien aigen zunden brengen. ⁴ Gainain aigent zokzulm dat eervolle amt tou. Nee, je mouten, net as Aäron, doartou roupen worden.
⁵ Zo het Christus ook zokzulm eer van hogepriester nait toukend. Dat het God doan, dij tegen Hom zegd het:
"Mien Zeun bistoe,
vandoag bin Ik dien Voader worden." ¹⁷
⁶ Krekt as E woaraargens aans zegd het:
"Doe bist priester veur aiweg en aaid,
net as Melchisédek." ¹⁸
⁷ In tied van zien levent op wereld het E mit roupen en reren en mit troanen in ogen Hom, dij Hom oet dood redden kon, beden en smeekt. En God het Hom in zien benaauwdhaid verheurd. ⁸ Aalhouwel Hai Zeun was, het E deur zien lieden omstoan leerd. ⁹ En dou E aan t ènd kommen was, kon Hai veur aaltied altmoal redden, dij doun wat of E wil, ¹⁰ en het God Hom noam geven: Hogepriester, net as Melchisédek.