Hebreeërs 3

Rust van God zien volk

⁷ t Is zodounde krekt as Hillege Gaist zegt:
"Vandoag, as ie zien stem heuren,
⁸ hebt den nait zukse stieve koppen
as joen veurolden haren,
dij tegen Mie in t èn kwammen in woestijn,
⁹ doar ze Mie oetdoagd hebben,
dou ze oetperbaaierden houveul of t lieden kon
ook al zaggen ze zulm wat of Ik doan haar,
vatteg joar laank.
¹⁰ Doarom wer Ik slim grammiedeg op dat volk en Ik zee:
'Ze dwoalen mor wat rond op biesterboan,
en zok wat van Mie aantrekken - ho mor!'
¹¹ Ik was hoagels heb dou sworen bie miezulm:
'Nooit zellen ze tou mien rust ingoan!'" ¹¹
¹² Denkt ter om, bruiers en zusters, gain kwoad haart! Gain ongeleuf! Nait ofvalen van God, dij leeft! ¹³ Mor ie mouten nkander moud inspreken, elke dag vannijs, zolaank as men nog van "vandoag" spreken kin. Loat joe nait deur zunde verlaaiden en zet stiekels nait in t èn. ¹⁴ Wie hebben ja dail kregen aan Christus, as we ons zekerhaid, dij we eerst haren, mor aan t ènd tou vaastholden.
¹⁵ Schrift zegt:
"Vandoag, as ie zien stem heuren,
hebt den nait zukse stieve koppen,
zo as dou ie tegen Mie in t èn kwammen." ¹²
¹⁶ En nou vroag ik joe: wèl wazzen dat den, dij, aalhouwel ze stem heurd haren, toch in opstand kwammen? Wazzen dat nait ale lu, dij onder Mozes tou Egypte oet trokken? ¹⁷ En op wèl was God vatteg joar laank vergrèld? Was t nait om heur, dij zundegd haren en dood in woestijn deelvalen wazzen? ¹⁸ Veur wèl het E aid oflegd dat ze nait tou zien rust ingoan zollen? Dat wazzen zai toch, dij nait lustern wollen? ¹⁹ Zo zai je kloar en dudelk: ze haren gain vertraauw en doarom konden ze der nait in.

4

¹ Veurzeggen is ter nog aaltied: bie Mie zellen ze tou rust kommen. Loat we der goud acht op geven, dat t nait krekt liekt of ain achter blift! ² Wié hebben bliede bosschop heurd, en zai krekt zo! Mor zai hebben van bosschop dij ze vernammen, gain perfiet had: ze heurden hom wel, mor leufden hom nait. ³ Mor wie, dij wel leufd hebben, kommen tou rust, krekt as Hai zegd het:
"Zo as Ik sworen heb - hoagels dat Ik was! -
'Nooit zellen ze bie Mie tou rust kommen.'" ¹³
Van t scheppen van wereld òf aan, was zien waark ja al doan. ⁴ Hai het ja woaraargens van zeuvende dag dit zegd:
"God rustte oet op zeuvende dag van aal zien waark." ¹⁴
⁵ En hier nog ais:
"Nooit zellen ze bie Mie tou rust kommen!"
⁶ t Is doarom hail zeker, dat ter n rust bestaat doar summegen ingoan maggen. Mor aandern, dij t eerste bliede bosschop heurd hebben, kwammen der nait in. Ze wollen ja nait lustern. ⁷ Doarom bepoalt God mit dat "vandoag" vannijs n dag. Doar let E Doavid n haile toer loater van zeggen - wie hebben t ter net al over had -:
"Vandoag, as ie zien stem heuren,
hebt den nait zukse stieve koppen!" ¹⁵
⁸ As Jezus ¹⁶ heur ja in rust brocht haar, zol E t loater nait over n aander dag had hebben. ⁹ God zien volk staait zodounde echte sabbatsrust nog te wachten, dat is wel dudelk. ¹⁰ Wèl tou zien rust ingoan is, rust ja oet van wat e doan het, net zo as God oetrust van zien waark. ¹¹ Wie mouten der ons doarom tou zetten, dij rust in te goan en der veur oppazen, dat we deur nait te lustern, in dezulmde vaal lopen as zai.
¹² In God zien woord zit ja levent en kracht; t snidt schaarper as n sweerd mit twij sniekaanten. t Gaait deur alles hèn: zo daip, dat liggoam van gaist en maarg van bain, schaaiden wordt. t Brengt veurndag wat n mensk zien haart vuilt en denkt. ¹³ Niks in wereld kin veur Hom bezied kroepen. Ale dingen liggen open en bloot veur zien ogen. En Hai wil mit ons ofreken.