Hebreeërs 3

Christus meer as Mozes

¹ Doarvandoan, beste bruiers en zusters, ie binnen roupen deur God. Doar geef je gevolg aan. Holdt Jezus veur ogen, apostel en hogepriester, dij wie altmoal belieden. ² Traauw aan God was E, dij Hom aansteld haar, krekt zo as ook Mozes traauw was in zien hoes. ³ Mit dit verschil: Hai het veul meer eer verdaind as Mozes. Baauwer is toch meer weerd as wat e timmerd het! ⁴ Elk hoes wordt deur ain of aander baauwd, mor Hai, dij haile boudel moakt het, dat is God. ⁵ t Is woar: Mozes was traauw in zien haile hoes. Mor loat we wel wezen: hai was bloots helper. Zien toak was om bekend te moaken wat of ter zegd worden zol. ⁶ Mor Christus was traauw as Zeun. Hai was aansteld over zien hoes. Joa, wie binnen zulm zien hoes, as we teminnent mor driest en blied - en doar bin we grootsk op - stief vaastholden aan wat ons in t veuroetzicht stèld is.